Основното јавно обвинителството покрена истрага против три лекарки од Клиниката за инфективни болести , врз основа на Кривична пријава која ја поднесе семејството на малата Анамарија која, почина во јануари годинава, само неколку часа откако била донесена да прими инфузија.
Обвинителот врз основа на истрагата треба да одлучи како ќе се постапи понатаму . Од адвокатската канцеларија која го застапува семејството велат дека се зависи од од судските вештаци кои ќе одлучат дали ќе биде побарана ексхумација на телото, односно дали ќе биде возможно да се направат потребните испитувања и дали ќе го дадат очекуваниот ефект.
Обдукација на телото не е направена бидејќи семејството потпишало дека не сака да се врши аутопсијата. Сепак,таа е задолжителна кога пациент ќе почине во болнички услови.
„Поднесена е кривична пријава, с е превземаат сите дејствија, обвинителството работи на случајот се со цел да се докаже вистината.“ изјави за НОВА адвокатката на семејството, Билјана Јандриоска.
Таа вели дека досега две комисии од Министерството за здравство го испитувале случајот, но семејството нема добиено никаков одговор од таму. Според Јадриоска на семејството на Анамарија не им била дадена медицинската документација од страна на клиниката, документите ги добиле дури кога адвокатката ги побарала по службена должност.
Таа вели дека немаат добиено никакви дополнитени анализи што тогаш ги најави директорот на клиниката Звонко Миленковиќ. Во медицинското досие, нема анализи кои покажуваат дали имала вирус или некаква бактерија, вели нивниот правен застапник.
После смртта на девојчето, родителите објаснување побарале кај многу врвни лекари. Како што вчера во писмото објасни таткото, се претпоставува дека срцето на девојчето откажало поради албумините кои и биле дадени(за кои лекарите требало да побараат дозвола од родители) и од гликозата која и била дадена и покрај високиот шеќер во крвта кој бил дури (16 единици).
Сепак, во адвокатската канцеларија информираат дека никој од лекарите кои го тврдат тоа, не го ставил својот потпис како гаранција дека е нарушен протоколот на лекување.
Од Министерството за здравство стигна следниот одговор:
„Во врска со случајот на починато девојче на Универзитетската клиника за инфективни болести и фебрилни состојби од јануари годинава, информираме дека Министерството за здравство веднаш по настанатиот случај, формираше две независни стручни комисии, кои целосно го испитаа процесот на лекување на пациентката, почнувајќи од матичен лекар, педијатриски пункт во поликлиниката „Јане Сандански“ и Клиниката за инфективни болести.
Врз основа на извршениот надзор, двете комисии се изјаснија дека не се констатирани недостатоци при пружање насоодветна здравствена заштита на сите нивоа, односно од страна на матичен лекар, педијатар во педијатрискиот пункт и здравствените работници на Клиника за инфективни болести.
Извештај од стручниот надзор е испратен до основното јавно обвинителство кое води постапка за овој случај“, се вели во одговорот на ресорното Министерство.
Писмото кое вчера го испрати таткото на 12 годишната Анамарија ја разбранува и ја вознемири јавноста.
Во писмото со наслов„ Во болница ја однесовме на нозе, за неколку часа ни ја вратија мртва“ што вчера го објави НОВА таткото на Анамарија ја опишува цела хронологија на настанот, од моментот кога ја однеле на матичен лекар до Клиниката за инфективни болести, каде за неколку часа починала. Тој ги обвинува лекарите за смртта на својата 12 годишна ќерка.