Јавното обвинителство на Република Македонија денеска ќе ги соопшти резултатите од дополнителната истрага за сообраќајната несреќа од 26 март на автопатот Велес- Скопје кај клучката Хиподром, во која загина новинарот Никола Младенов, сопственик на дневниот и неделниот весник „Фокус“.
Резултатот на истражниот судија беше дека сообраќајната несреќа била несреќен случај. Судот тогаш соопшти дека Младенов возел со 160 километри на час и притоа изгубил контрола над возилото и излетал од патот.
Минатиот месец специјалниот известувач на ОН, Ла Ру ги повикувам надлежните македонски органи да започнат темелна истрага за овој „ноторен случај со цел бргу да се распрсне облакот на сомнеж и страв што беше создаден со трагичната смрт на г-динот Младенов“, рече Ла Ру.
>>ОН: Ги повикуваме властите на истрага за Младенов
Обвинителството го презеде предметот за Младенов на 11 април, после два дена откако истражниот судија Јосифов ја затвори истрагата и информираше дека веќе следната недела по преземањето на случајот ќе има информации од нивна страна, што тоа досега не се случи.
Постојат две опции: Обвинителството да го констатира претходниот заклучок на истражниот судија дека се работи за класична сообраќајна несреќа или доколку има поинакви индиции, дека се работи за насилна смрт, да побара дополнителна истрага после што би следувала класична кривична истрага.
Најинтригантен податок во оваа истрага е прашањето за мобилниот телефон на Младенов, за кој портпаролот на Кривичниот суд Владимир Туфегџиќ за НОВА, на 9 април рече не е предмет на анализа.
За листинзите од разговорите на мобилниот Туфегџиќ исто така рече дека не е информиран.
Изворите на НОВА, потврдуваат дека надлежните институции инволвирани во истрагата не контактирале со семејството на Младенов, ниту пак со неговите најблиски соработници.
>>Прашањата на НОВА до истражните органи кои до денес не се одговорени