Илјадници луѓе се обидуваат денеска да дојдат до местата со ретките летови кои полетуваат од областите на Филипините најтешко погодени од тајфунот Хаијан, меѓу преживеаните бес и очај поради многу бавното пристигнување на помошта.
Осуммина загинале под навалата на илјадници луѓе да влезат во едно складиште со ориз. До несреќата дошло во моментот кога дел од складишето се урнало. Тајфунот Хаијан остави десетици илјади луѓе без храна и без покрив над главата.
Официјалната бројка на загинатите од катастрофалниот тајфун што ги погоди Филипините изнесува 2275 луѓе, 80 се водат за исчезнати, а 3655 биле повредени, соопштија денеска властите на таа земја. Сепак поради ситуацијата тешко е да се каже точната бројка на жртвите.
Иако поминаа пет дена од катастрофата многумина во Таклобан губат секаква надеж дека помошта ќе стигне и се обидуваат по секоја цена да побегнат од оваа апокалипса.
Некои од нив исцрпени, потресени и гладни предизвикаа голем метеж утрината на аердоромот во тој град во обид да влезат во некој од воените авиони кои носат хуманитарна помош и опрема.
Иако меѓународната заедница вети помош, а цела флота на западни бродови тргна кон Филипините, помошта пристигнува многу бавно, а филипинските власти денеска рекоа дека сите патишта се проодни на двата најпогодени острова.