Од 1 мај ќе има бесплатен железнички превоз за повеќе категории граѓани, односно за млади, студенти и средношколци како и за пензионери. „Со оваа мерка овозможуваме континуирана поддршка на граѓаните со цел поттикнување на железничкиот сообраќај како најевтин и еколошки превоз“, се вели во соопштението од Министерството за транспорт и врски.
Согласно возниот ред на Железници на Република Северна Македонија – Транспорт за 2022 година, бесплатен воз ќе може да користат млади лица до 27 години, секоја прва и трета недела во месецот, и во викенд денови од петок од 12 часот до понеделник до 12 часот. Дополнително, секој четврток пак превозот ќе биде бесплатен за студенти, а секоја среда за средношколци.
За пензионерите, односно за сите жени од 62 години и мажи од 64 години оваа мерка ќе важи секој втор викенд во месецот (петок, сабота и недела), велат од Железници.
Бесплатните патувања во внатрешниот железнички патнички сообраќај за пензионерите и младите беа привремено стопирани во март 2020, кога почна пандемијата. (Р.Н.)