Очитe на светската јавност се свртени кон кампот во „Идомени“ каде што околу 15.000 бегалци чекаат за влез во Македонија и да продолжат низ Балканската рута. Но малку кој зборува за околу 1.000 луѓе кои се заглавени на македонско-српската граница. Заглавени, заборавени и многу верoјатно отфрлени затоа што по новите правила само бегалците од Сирија и Ирак може да добијат азил, не и другите како овие Авганистанци кои тука се со недели бидејќи Србија не ги пушта затоа што ЕУ не ги прима.
Абдула е од Авганистан. Патот од неговата земја го почнал пред два месеца но наместо подобар живот, се најде заглавен на преминот во Табановце.
– 20 дена сум овде, 15 бев во Турција. Во земјата од каде што доаѓам е многу лошо, пукаат и Талибанци и Даеш, во нашето селе беше многу страшно, вели тој.
Слична е и приказната со друг Авганистанец. Неговиот сон е да стигне до Германија, но српските власти не му дозволуваат.
– Во Табановце сум можеби 19 или 20 дена. Полицијата не не пушта и рекао дека границата била затворена за Авганистанци. Нам не ни е јасно зошто не не пуштаат да одиме, објаснува тој.
Агонијата е малку поблага за граѓанин на Ирак, кој патува со синот и со сопругата и не губи надеж дека еден ден ќе работи како тон мајстор некаде на безбедно во Европа.
– Ужасно е, катастрофа, можеби не толку за мене колку за мојот мал син. Мојата дестинација е било каде на безбедно во Европа. Јас сум тон-мајстор и се надевам дека тоа ќе го работам, раскажува Ирачанецот притоа напоменувајќи дека тој бил и активист на социјалните мрежи, па оттаму и заканите по неговиот живот.
И додека зад камерите бегалците постојано од новинарските екипи бараа информации за денешниот самит посветен на бегалската криза, временските услови дополнително им го загрозуваат престојот во Табановце.
Оние кои беа на самиот влез кон Србија, а помеѓу нив и луѓе од ранлива категорија, сепак не се откажуваат во својата истрајност.
Табановце во моментов оперира над своите капацитети и веќе е исполнет бројот. Управителот на транзитниот центар, Горан Стојановски вели доколку се затвори Балканската рута, се размислува за преместување на импровизираниот ентериер со цел престојот на бегалците внатре да биде покомотен.