Со последниот гол на босанскиот голман Асмир Беговиќ, листата на голмани кои постигнале погодок за својата екипа во модерната историја на англиската Премиер лига се прошири на петмина. Беговиќ на 2 ноември 2013, во натпреварот на својата екипа Стоук, против Саутемптон кој заврши 1-1, уште во првата минута постигна погодок „од гол на гол“.
Најпрво тоа го направи Петар Шмајхел во поразот на неговата Астон Вила против Евертон на 20 октомври 2001 година.
По него следеше Бред Фридл за Блекбурн против Чарлтон, на 21 февруари 2004 година. Натпреварот заврши 2-2.
Пол Робинон, некогаш прв голман на англиската репрезентација, на 17 март 2007 година, постигна гол од речиси 80 метри за Тотенхем против екипата на Ватфорд.
Не толку неодамна се придружи и американскиот голман Тим Хауард во ова друштво. Тој за Евертон постигна гол во поразот против Болтон од 2-1, откако ја шутна топката од приближно 93 метри. Гол за кој велат помогнал и ветрот кој дувал речиси 96км на час. Овој гол „падна“ на 4 јануари 2012 година.
Листата на голмани кои погодувале е долга, веројатно вечен на таа листа поради начинот на кој се игра модерниот фудбал, ќе остане Рожеиро Сени, кој со своите 40 години сеуште брани за Сао Пауло. Тој има постигнато неверојатни 112 погодоци во својата кариера. Втор на вечната листа е Хозе Луис Чилверт од Парагвај со вкупни 62, а на третото место е Димитар Иванков од Бугарија кој постигнал 42 погодоци.