Градбата на новиот театар и новата градска библиотека во Тетово се уште не започнала. Лани на 28 ноември на денот на албанското знаме, се постави камен темелник за овие културни зданија, кои владата ги најавува седум години по ред. По тој повод се одржа свеченост, каде присуствуваа сите министри на ДУИ.
Тогаш се фрлија неколку лопати со малтер, но веќе трет месец нема никакви градежни активности. Градежната парцела само се огради, а во неа со месеци стои паркирана градежната механизација. Хаки Фазлиу, директор на Културниот дом Тетово, институција надлежна да менаџира со изградбата на објектот, вели дека најпрвин треба да се дислоцира трансформаторот лоциран на градежната парцела, па потоа да се започне со градење. За сето ова е потребно време.
– Трансформаторот е објект на ЕВН, кој со струја снабдува 10 населби во Тетово. За да се дислоцира потребен е подолг период, но и стручност. Во преговори сме со ЕВН, нивни екипи да го извршат дислоцирањето. Затоа што освен трансформаторот, под самата градежна працела постојат и кабли за струја. Ние не сме знаеле дека се работи за толку комплициран транформатор. Ние планиравме со градба да започнеме утредента по поставувањето на камен темелникот, но работата малку се искомплицира, изјави директорот на културниот дом Хаки Фазлиу.
Новиот театар и новата градска библиотека ќе се градат на еден од ретките паркинг простори во Тетово, наспроти Културниот дом. Граѓаните реагираат. Сега останавме без доволно паркинг места, на сметка на објект кој нема абер да започне да се гради, велат тие.
– Градот е во тотален сообраќаен хаос, без доволно слободни паркинг места. Најчесто автомобилите ги паркиравме на овој паркинг простор, кој што сега е ограден наводно за некаков објект од областа на културата. Но, како што гледам тука ништо не се гради, вели еден тетовец.
– Не верувам дека нешто ќе се изгради во Тетово, тука ништо не се инвестира, па и долго најавуваниот објект преставува чист политички маркетинг, додава друг граѓанин.
Директорот на културниот дом Хаки Фазлиу, вели дека граѓаните треба да бидат трпеливи. Со изградбата на објектот, се предвидуваат и подземни гаражи, со што конечно ќе се реши проблемот со паркирањето во овој дел на градот.
– Првично се предвидени подземни гаражи на три ката под приземјето. Колку ќе се оди надолу, зависи од структурата на земјиштето, за која претходно има направено стручна анализа. Но, сепак праксата ќе покаже дали ќе може да има три ката подземни гаражи. Ако не бидат три, два ката ќе има сигурно, изјави Фазлиу.
Вкупната инвестиција за новиот театар и новата градска библиотека ќе изнесува 13 милиони евра. Доколку се реализира овој проект, ќе се реши долгогодишниот проблем со недостигот на просторни услови, со кои се соочуваат тетовските актери. Тие подолг период немаат слободни термини за проби и одржување на престави во Културниот дом. Според проектот, театарот е со капацитет за 700 лица а библиотеката ќе располага со простор за 500 000 книги. И двете зданија ќе бидат дел од еден мултифункционален објект, каде ќе има и кино сала.