Од ноќеска на полноќ стапува изборниот молк, пред вториот круг од локалните избори кои ќе се одржат в недела.
Од Агенцијата за аудио и аудиовизуелни медиумски услуги укажуваат дека од полноќ кога почнува изборниот молк што трае до 19 часот во недела на 29 октомври 2017 година медиумите продолжуваат да известуваат за изборите и за текот на гласањето, но не смее да се емитува ниту еден од облиците на изборно медиумско претставување.
– При известувањето во деновите на изборниот молк ќе се смета дека медиумите го прекршиле изборниот молк доколку емитуваат, односно објават какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија изборна кампања и можат да влијаат врз одлуката на избирачите, податоци со кои го откриваат идентитетот на политичките субјекти и/или на поединци вклучени во инциденти или други неправилности на денот на гласањето како и изјави од кандидати во изборниот процес, од учесниците во изборна кампања, од претставници на политички партии и од носители на функции во органите на власта, соопштуваат од Агенцијата.
Агенцијата очекува сите радиодифузери, почнувајќи од ноќеска на полноќ, да ја приспособат својата програма за изборниот молк.
Вториот круг од локалните избори во Македонија ќе се спроведува на 1.517 избирачки места во 35 општини, каде право на глас имаат 833.710 граѓани.
Во Скопје ќе се гласа во општините Бутел, Кисела Вода, Гази Баба, Шуто Оризари, Чаир и Сарај, а право на глас имаат 260.194 граѓани, кои ќе гласаат на 387 избирачки места.
Во останатите 29 општини во Македонија во вториот круг ќе гласаат 573.616 граѓани на 1.130 избирачки места.
Изборната кампања за вториот круг завршува утревечер, на 27 октомври во 24 часот, по што следи изборниот молк кој трае до завршувањето на изборите во 19 часот на 29 октомври.
Во првиот круг од локалните избори беа избрани градоначалници на Скопје и на 45 општини.