Патниот правец Маврово – Дебар, делница Маврови Анови – Жировница, од утре -24 август од 10:00 до 16:00 часот ќе биде со изменет сообрајќаен режим поради градежни активности, информираа од општина Маврово и Ростуше.
Додаваат дека измената на сообраќајниот режим на овој патен правец во период од 45-60 дена, ќе биде со комплетно затворање на делницата во одредениот временски период во кој ќе се одвиваат градежните активности – асфалтирање на Регионалниот пат Р1202.
-Општина Маврово и Ростуше им препорачува на сите оние кои ќе се движат по овој патен правец во споменатиот период, за прилагодена брзина на движење, почитување на поставената сообраќајна сигнализација и внимателно управување со возилата, стои во известувањето од општината.
Делницата е во должина од 18,5 клометри, со ширина од 6 метри, а издвоената вредност за реализација на овој проект е 6,18 милиони евра, средства обезбедени преку ЕБОР.
Трасата на оваа делница всушност е продолжение на веќе рехабилитираната делница Бунец–Маврови Анови.
-Со проектот за рехабилитација на оваа делница предвидено е да се изведат повеќе градежни зафати, дел од нив веќе реализирани, како што се еднослојна и двослојна надградба на сегменти од трасата каде што површинските оштетувања се поизразени, нова коловозна конструкција на делови од трасата каде што коловозот е во лоша состојба, санација на мостови, реконструкција, доградба и изведба на нови потпорни ѕидови, нова сообраќајна сигнализација, обележување на патот и други работи со кои ќе се подобри безбедноста на делницата, вели градоначалникот Медат Куртовски.
Додава дека цел на локалната самоуправа, со подршка на централната власт, е со реализацијата на проектот да се обезбедат подобри услови за одвивање на сообраќајот, што значи безбедно, побрзо и непречено негово одвивање.