Од утре па во наредните 6 месеци, во Управата за водење на Матични книги ќе можат да се пријавуваат сите лица кои не се евидентирани во Матичната книга на родени, најави министерката за труд Мила Царовска. Се проценува дека во Македонија има околу 3000 лица кои немаат никакви документи и државјанство. Овие лица „фантоми“ ќе добијат привремен регистарски број, со кој ќе можат да добијат здравствена заштита, право на социјална помош и образование.
Директорот на Управата за водење матични книги Бујар Дарлишта рече дека на ваков начин ќе се овозможи целосна социјална инклузија на лицата кои досега биле на маргините на општеството и не ги уживале правата, поради тоа што нивните раѓања не се пријавени во матичната книга на родените и не можат да добијат прв извод на родени.
– Повикот ќе трае шест месеци, од 1 април до 30 септември 2018 година. Во овој период сите лица кои не се регистрирани или пак ги немаат регистрирано нивните деца во матичните книги да појдат во подрачните единици на Управата и да поднесат барање за дополнително запушување. Тоа важи за лица родени во домашни услови или во здравствени установи, но, нивните родители не го пријавиле раѓањето, рече тој.
Поддршка на овој процес ќе дадат и меѓународни организации кои ќе помогнат во теренските активности за лоцирање и информирање на овие лица, како и помош да дојдат до подрачните единици и да поднесат барање за дополнително запишување.
Во февруари минатата година НОВА објави сторијата со наслов „Во Македонија има 3000 „фантоми“ без никакви човекови права“ во која се пренесува голготата низ која минуваат овие семејства, но и негрижата на државата за овие луѓе.