Делегација на град Скопје, предводена од градоначланикот Коце Трајановски и претседателот на градскиот Совет Ирена Мишева, положија цвеќе на гробот на поранешниот Претседател на Република Македонија, Борис Трајковски и на гробовите на дел од лицата кои загинаа во авионската несреќа, на Градските гробишта во Бутел.
Цвеќе положија и делагации од Владата и Собранието, како и од државни институции, политички партии, претставници на дипломатскиот кор и здруженија на граѓани.
Денеска се обележува 11 годишнината од трагичната смрт на на поранешниот македонски претседател Борис Трајковски, кој загина во авионска несреќа кај Ротимље во близина на Мостар, Република Босна и Херцеговина.
Покрај Трајковски, загинаа и осум лица кои беа во авионот: портпаролот на Претседателот Трајковски, Димка Илкова Бошковиќ, советниците на претседателот Ристо Блажевски и Анита Лозановска, претставникот на министерството за внатрешни работи Миле Крстевски, телохранителите Аце Божиновски и Борис Велиновски, како и пилотот и копилотот на авионот Марко Марковски и Бранко Ивановски.