Министерството за образование вчера најави дека ќе се бара одговорност од наставниците и директорот во случајот со екскурзијата на неготински средношколци во Италија.
-Наставниците и директорот на училиштето во ниту еден случај не смееле да ги остават учениците сами и да заминат без нив. Станува збор за малолетни лица кои им биле доверени ним. Исто така, загрижувачко е однесувањето на учениците за време на изведувањето на екскурзијата, за што исто така може на учениците да им бидат изречени педагошки мерки, велат од Министерството во изјава за МИА.
Државниот просветен инспекторат ќе изврши увид во гимназијата и ќе ги даде своите препораки.
– Ваквото нивно однесување спрема учениците е основ за поднесување на одговорност. Секако и на родителите им останува можноста за покренување постапка за одговорност на наставниците за нивната негрижа спрема учениците, додаваат од МОН.
Случајот со неготинските средношколци во јавноста беше презениран преку два проблеми, од кои едниот го посочија родители на двајца улениците, кои биле оставени во хотелот, додека групата заминала на еднодневна екскурзија во Франција.
Другиот проблем го објави агенцијата организатор, која информира дека поради недоличното однесување на дел од учениците од оваа група, агенцијата партнер од Белград која посредува во организирање на екскурзијата, ја прекинува сорабоката со нив, а италијанските парнери не сакаат повеќе гости ученици од Македонија.
Во некои медиуми беа објавени згрозувачки фотографии од вршење нужда на подот на хотелски тоалет.