Постапувајќи по предлог на Основното јавно обвинителство за гонење организиран криминал и корупција, судија на претходна постапка при Основниот суд Скопје 1 – Скопје, по произнесување на спроведените лица во судот во однос на предлогот на обвинителството, донесе решенија со кои за О.П., О.Р., И.Д., М.П. и М.Ч. го прифати предлогот на обвинителството и им определи мерка притвор во траење од 30 дена, соопшти Основниот суд Скопје 1.
За лицата Е.Б. и С.М., судијата не го прифати предлогот за определување мерка притвор, а како мерка за обезбедување присуство им определи мерка куќен притвор.
За останатите лица, за кои се уште не е завршено сослушувањето, по донесено решение на судија на претходна постапка во однос на предлогот на обвинителството, јавноста ќе биде информирана утре преку соопштение на веб-страницата на судот со целосна информација за донесените решенија, се додава во соопштението.
На Игор Дурловски, еден од организаторите на протестите „За заедничка Македонија“ му е одреден 30-дневен притвор. Судот му одреди 30 дневен притвор и на Митко Чавков. Тој денеска беше одведен во судот поради настаните во Собранието на 27 април годинава.
Чавков на ваквата одлука се жалел со својата здравствена состојба.
Според неофицијалните информации, Чавков е веќе спроведен во истражниот затвор во Шутка.
Пратеникот на ВМРО-ДПМНЕ, Крсто Мукоски си замина по распитот пред судот. Тој не сакаше да дава никакви коментари и да одговара на новинарските прашања.
Мукоски е еден од шестемина пратеници за кои Судот не може да одреди притвор бидејќи имаат пратенички имунитет. За нив поднесено е барање до Собранието за одземање на имунитетот.
Судот вечерва одреди притвор од 30 дена и на актерот Владо Јовановски кој исто така беше во Собранието на 27 април.
Протести
Пред Кривичниот суд Скопје се уште трае протестот на приврзаници на ВМРО-ДПМНЕ, против приведувањата пратеници и други лица за учество во настаните во Собранието од 27 април годинава.
Претседателот на ВМРО ДПМНЕ Никола Груевски на прес конференција рече дека акцијата на МВР е „последниот чин на пресметка со слободномислечкиот граѓанин кој искажал став против тиранската платформа, кој мисли македонски и се грижи за државата“. Акцијата ја спореди со Дивиот запад. Тој побара „итно и безусловно запирање на сите процеси на политички прогон, малтретирање, терор и иживување и ослободување на сите лица кои се цел на политички прогон“.
На протестот се обратија актуелни и поранешни пратеници, членови на опозициската партија, кои повикаа за итно ослободување на приведените лица.
На протестот присуствуваа генералниот секретар на ВМРО-ДПМНЕ Кристијан Мицковски, поранешниот градоначалник на Аеродром Ивица Коневски, лидерот на ГРОМ Стевчо Јакимовски, Соња Тарчуловска, сопругата на пратеникот Јохан Тарчуловски, актерот Тони Михајловски и поранешниот директор на Архивот на Македонија Филип Петровски.
Вечерва граѓани ги блокираа и крстосниците кај Тутунскиот комбинат во Кисела Вода, крстосницата кај трговскиот центар Мавровка, а запрен е и сообраќајот кон Ѓорче Петров кај Порта Влае.