Министерката за внатрешни работи Гордана Јанкулоска и минитерот за транспорт и врски Миле Јанакиески си поднеле оставка, потврди за НОВА портпаролот на Владата Александар Георгиевски.
– Тоа е точно, а владата вечерва испрати предлог за именување на нови министри. Митко Чавков досегашниот шеф на Бирото за безбедност е предложен за нов министер за внатерешни, додека Владо Мисајловски, државен секретар за надворешни работи е нов предлог за транспорт и врски, вели портпаролот за НОВА.
За одлуката Јанкулоска писмено го известила премиерот Никола Груевски.
Јанкулоска во оставката истакнува дека во изминатиот период работела професионално и посветено раководејќи се од интересите на граѓаните и на државата.
– Почитуван претседателе Груевски,
Најнапред сакам да Ви се заблагодарам за довербата што ми ја дадовте да бидам дел од Вашиот тим и да раководам со Министерството за внатрешни работи на Република Македонија. Во изминативе години, не штедејќи време и енергија, работев професионално и посветено, секогаш раководејќи се од интеерсите на граѓаните, и пред се, раководејќи се од интересот на Република Македонија.
Во овие тешки денови, кога Македонија е во длабока политичка криза, ценам дека е време да се повлечам, верувајќи дека моето повлекување од функцијата министер за внатрешни работи, ќе придонесе за нејзиното надминување, стои во оставката од министерката Јанкулоска.
Образложението на оставката на Миле Јанакиески говори за прислушкуваните ленти, за кои вели дека се сечени, лепени, монтирани и не сака да влијае на постапката.
Фото на оставката на Јанакиески: Телма