Екипата на НОВА е во Куманово каде што повеќе од два часа не се слушаат пукотници. Полицијата го обезбедува местото, а од населбата „Диво Насеље“ постојано се изнесуваат оштетени полициски возила и хермелини.
Куманово е денеска пораздвижено од вчера, иако жителите се уште се плашат, а екипата на НОВА се уште забележува граѓани кои што живеат во близина на пукотниците како со торбици излегуваат и заминуваат кај роднини.
– Ќе си одам, живеам на две минути од местото. Сега е мирно, ама вчера вечерта рекоа дека огнот прекина, а утринава пак се пукаше. За секој случај ќе одам кај роднини во центарот на Куманово, вечи средовечна жителка која живее спроти пазарот.
НОВА дојде и од другата страна на Куманово, односно во центарот на градот каде што се наоѓаат општинаската зграда, поштата и кафулиња. Ако на само 10 минути пеш нивните сограѓани се иселуваат од дома, од оваа страна е мирно. Работат повеќето од дуќаните, а полни се и дел од кафулињата.
Советот на Град Куманово донесе одлука да одвои 2 милиони денари од буџетот за помош на раселените лица. Исто така, луѓето кои не нашле адекватен простор за сместување ќе добијат помош од општината да се сместат. На располагање ќе бидат и неколку месни заедници.
Основните и средните училишта со одлука на Советот утре нема да одржуваат настава поради, како што вели градоначалникот, од „безбедносни причини“.