Во рамките на програмата на манифестацијата „Охридско лето“ вечерва во црквата „Света Софија“ свој концертот ќе одржи светскиот виолончелист Антонио Менезес кој заедно со Олга Задо, една од најперспективните пијанисти од нејзината генерација, ќе изведат дела на Шуман, Брамс, Франк. Концертот почнува во 21 часот.
Антонио Менезес е роден во Бразил. Првата награда ја освои на ARD International Competition во Минхен во 1977 година, а ги освои првата награда и златниот медал на натпреварот „Чајковски“ во Москва во 1982 година. Настапува редовно во големите музички центри низ Европа, Америка и Азија, Менезес има изведувано со повеќето водечки оркестри во светот, меѓу кои и Берлинската филхармонија, Лондонската симфонија, Концертгебау, Њујоршката филхармонија, Израелската филхармонија и НХК Симфонијата од Токио.
Олга Задо е победник на меѓународните натпревари „Владимир Хоровиц“ и „Сергеј Прокофјев“, a исто така таа ја освои и специјалната награда „Тереза-Дусот“ на меѓународниот натпревар Владимир Крајнев“. Задо веќе настапува со оркестри, во соло рецитали, како и со меѓународно признати уметници, како што е виолончелистот Антонио Менезес, во големи концертни сали и места низ Европа.
