Предистражната постапка за смртта на Коста Крпач е отежната, бидејќи Специјалното обвинителство не доставува информации за тоа кој му се заканувал и за какви закани станува збор, обвинуваат од Основното јавно обвинителство (ОЈО).
Од ОЈО велат дека од документираните доказни материјали, вештачења и од сведочењата на лица констатирано е дека неспорно станува збор за самоубиство. Она што се истражува во моментов е дали има основа за сторено кривично дело „наведување на убиство“.
Во текот на досегашната истрага, неуспешно било вештачењето на мобилниот телефон на Крпач, бидејќи не можеле да го пробијат пасвордот.
Клучно за нив е пресвртот во однесувањето на Крпач кое настанало по извршениот претрес на СЈО кај него дома на 6 . април годинава. Дента после претресот, Крпач се појавил како сведок во СЈО.
Според Државното обвинителство, пресвртот бил претресот, а за аболицијата која предизвика и серија граѓански протести немаат информации како влијаела врз Крпач, иако тој се најде на листата на помилувани од претседателот Иванов.
Обвинителството тврди дека СЈО досега дало одредени податоци, од кои дел биле проверливи, а дел непроверливи. Не прецизираа за какви точно информации станува збор, но инсистираат СЈО да ги достави и бараните податоци од Записникот.
Коста Крпач беше пронајден мртов во неговиот стан на 27. април, по пријава на сосед. Од Обвинителството велат дека пријавувачот се нашол сосема случајно во близина и ги слушнал рафалните истрели од кои неколку завршиле во комбе на паркингот пред зградата каде што живее Крпач.
Досегашната истрага покажала дека Крпач пукал со сопствен револвер и за тоа поседувал дозвола. Нејасно е зошто пукал во комбето, а потоа си го одзел и животот.
Револверот бил во негова сопственост и за него поседувал дозвола. Обвинителството не одговори колку куршуми се пронајдени во телото на Крпач
Во досегашната истрага Обвинителството испитало 19 лица, од кои 10 се овластени службеници во МВР, а 9 лица поврзани со Крпач, вклучително и бизнис партнери, чии имиња одбија да ги обелоденат.
Сведочела и сопругата на Крпач која кажала за настанатите промени во неговото расположение, но не дала исказ дали и какви закани тој трпел.
Сведочел и сопственикот на комбето кое за време на инцидентот било паркирано спроти зградата и било заклучено дека нема никаква поврзаност со самоубиството.
Од обвинителството не одговорија дали имаат информации дека Крпач бил следен, а во оваа фаза од истрагата не сакаа да откријат и како точно се самоубил.
Од ОЈО апелираат „да надвладее разумот“ и СЈО да сподели информации со нив за тоа кој му се заканувал на Крпач.
Брифингот во Основното јавно обвинителство доаѓа ден после објавената истрага на СЈО за случајот „Трезор“, поврзана со фирмата Финзи ДООЕЛ Скопје, во која управител беше Коста Крпач.
Во „Трезор“ осомничени се поранешниот директор на УБК Сашо Мијалков, поранешниот началникот на петтата управа Горан Грујовски, шефот на кабинетот на Мијалков,Тони Јакимовски и бившиот помошник министер во МВР и член на Управен одбор на Телеком Небојша Стајковиќ, но ОЈО не соопштува дали тие сведочеле и за убиството на Крпач.
Од Обвинителството велат дека брифингот доаѓа поради заинтересираноста на новинарите за случајот и не го коментираа „Трезорот“ кој го обелодени СЈО.