Скопското Обвинителството бара притвор за шест лица за автобуската несреќа кај Ласкарци. Меѓу нив е и сопственикот на „Дурмо турс“, раководителот на фирмата, возачот на автобусот и лица кои дале одобрение за техничката исправност на автобусот и кои се вработени во друга фирма која исто така е во сопственост на газдата на „Дурмо Турс“.
Скопскиот обвинител Сашо Рајчев кажа дека истрагата покажала дека причина за несреќата е големата брзина, но и делумната неисправност на сопирачките.
Пред несреќата, возачот возел 99 километри на час, иако било дозволено 80. Во автобусот бил инсталиран посебен уред за манипулација на технографот, кој ја мери брзината на движење. Кога ја пречекорил дозволената брзина, возачот го вклучил овој уред.
Истрагата покажала дека поради големата брзина, возачот во критичниот момент изгубил контрола врз автобусот и најпрво удрил во првата заштитна ограда. тогаш почнал да кочи, но поради нецелосна функционалност на сопирачките и брзината автобусот ја пробил и втората заштитна ограда и паднал во провалијата.
Сериозни пропусти се утврдени и кај техничкиот преглед на автобусот.
Техничката контрола на автобусот била извршена во јули лани, кога биле утврдени недоследности кај сопирачките, но и покрај тоа бил издаден документ дека се исправни. Истото се случило и при техничкиот преглед на автобусот во декември лани.
Со вакви неисправни сопирачи и со инсталиран уред за манипулирање со брзината, автобусите возеле секојдневно.
Сите шест лица ќе одговораат за тешки дела против безбедноста на луѓето и имотот во сообраќајот. Осомничено е уште едно лице, но за него ќе се бараат мерки за претпазливост .
Во текот на предистражната постапка биле сослушани 47 лица, било извршено вештачење од Машинскиот факултет за функционрирање на системот на автобусот и од Електротехничкиот факултет за уредот што ја покажува брзината.
Несреќата се случи на 13 февруари кога автобусот на „Дурмо турс“ со 51 патник излета од патот Тетово-Скопје и падна во провалија откако ја проби заштитната ограда на автопатот. Загинаа петнаесет луѓе, а дел од повредените се уште се наоѓаат на скопските клиники.