Германскиот канцелар Олаф Шолц, во име на Социјалдемократската партија на Германија, упати порака во која искажа поддршка за Социјалдемократскиот сојуз на Македонија, на претседателот на партијата Димитар Ковачевски и на претседателскиот кандидат Стево Пендаровски, за претстојните избори и за натамошниот европски пат на Македонија кон полноправно членство во Европската унија.
- Изборот е во ваши раце, а европската иднина на Северна Македонија ќе се поддржи со давaњето на гласот за СДСМ, со Димитар Ковачевски како премиер и Стево Пендаровски како претседател. Патот кон Европската унија не беше лесен за Северна Македонија, како и дека неуспесите и одложувањата разбирливо доведоа до разочарување во нашата земја, порача Шолц во видео пораката која беше прикажана на одбележувањето на почетокот на кампањата на СДСМ за парламентарните избори што се одржува денеска во Скопје.
СДСМ покажаа голема решителност да ги надминат надворешните и домашните предизвици и да ги преземат неопходните чекори за изградба на посилна, попросперитетна Северна Македонија, вели германскиот канцелар во пораката, додавајќи дека тие ја водеа земјата во НАТО и ги зајакнаа европските вредности на демократија и слобода.
- Ова е вистинскиот пат и имам целосна доверба дека тие успешно ќе ја водат Северна Македонија до целта и во Европската унија, нагласи Шолц. Вие, СДСМ и народот на Северна Македонија, во минатото покажавте храброст и јас сум убеден дека тоа ќе го покажете уште еднаш вели Шолц додавајќи дека земјата со храбрите одлуки може да се потпре на целосна поддршка од Германија бидејќи, како што нагласи Шолц, знаеме дека местото на Северна Македонија е во ЕУ.
Извор: Независен