Зголемен е бројот на скопјани кои колабирале на јавни места – само денеска до 14 часот имавме повици за интервенција за дури седум – осум колапси, а има и повеќе повици од лица со епилептични напади, предупредуваат од Службата за итна медицинска помош во Скопје.
И денеска продолжува топлиот бран во целата земја, со температури кои ќе се зголемат и до 40 степени Целзиусови. Лекарите апелираат граѓаните многу да внимаваат на своето здравје на овие горештини.
– Многу онесвестувања на граѓани имаше денеска на јавни места, дури 7-8 колапси, иако уште од изутрина дававме изјава на телевизија токму за тоа. Имаше повици до нашите екипи за колапси во ГТЦ, еден колабираше пред општината во Бутел, но се онесвестува граѓани и пред Градска болница, односно пред кулата кај Зелено пазарче и на уште неколку места во Скопје. И покрај сите апели, граѓаните, за жал, не водат сметка за здравјето и излегуваат и шетаат надвор во најтоплиот дел од денот – од 10 до 18 часот! Мора многу да се внимава – не смее температурната разлика да е поголема од седум до девет степени од просторијата каде некој престојува пред да излезе надвор. А не, како што многумина практикуваат – климата пуштена на 17 степени, а излегуваат надвор на плус 40 и повеќе степени! – вели д-р Ѓорѓи Карамановски, Службата за итна медицинска помош шеф на смена во скопската Итна помош.
Тој објаснува како влијае промената на температурите на организмот.
– Крвните садови на такви варијации во температурата страдаат, бидејќи при нивното нагло ширење и собирање, освен колапс, може да настане мозочен удар или срцев инфаркт но и да се случат напади на падавица (епилепсија). Затоа е многу опасно кога од разладена просторија излегуваме веднаш надвор или обратно. За среќа, до денеска до 14 часот немавме повик за интервенција за срцев или мозочен удар, предупредува д-р Карамановски.
Еве токму денеска има пример за температурен шок што се случил во гратчето Радовиќи, во Црна Гора. Родителите се вратиле од престојот на плажа со децата и откако ги внеле во претходно добро климатизирана просторија, на едно од децата му се слошило, па завршиле во Службата за итна медицинска помош, каде лекарите успеале да го стабилизираат детето коешто се онесвестило од наглата промена во температурите.
Од УХМР, каде и денеска излегоа со актуелно предупредување за високи температури, прогнозираат сончево и многу топло време, со мала, локална облачност.
– Ќе дува умерен, повремено засилен ветер од западен правец. Попладне, особено во источните делови, ќе има услови за изолирана појава на краткотраен пороен дожд и ретки грмежи. Максималната температура ќе биде од 32 до 39 степени. УВ индексот ќе изнесува 9. И во Скопје сончево и многу топло, попладне со мала облачност и со умерен до засилен ветер од западен правец, најавуваат од УХМР.
Љубица Балабан