Хирушките клиники и болниците во државата до 15 септември треба да започнат со видео снимање во операционите сали. Ова значи дека под итно треба да набават камери за снимање на операциите иако поголемиот дел од нив воопшто немаат распишано тендери или се подготвуваат да го сторат тоа.
Пред неколку дена во сите болници стигнало Укажување со кое Министерството за здравство ги потсетува дека до 1-ви септември имаат обврска да набават опрема за видео снимање и архивирање на операциите.
Директорите се во паника. Овој дополнителен трошок не само што ќе се одрази на и онака лимитираните буџети, туку создаде и збунетост бидејќи се во недоумица какви камери да набават. Во Укажувањето на Министерството е наведено какви камери да се набават, со која должина и дијаметар во ХД резолуција, што внесе уште поголема збунетост.
– Овие денови ќе го распишеме тендерот за набавка на камери во операционите сали. Според првичните проценки камерите ќе чинат од 130 000 до 150 000 евра и незнаеме како и кога ќе ги платиме. Постојано сме во комуникација со колегите во другите клиники бидејќи податоците за техничките каратеристики добиени од Министерството не се доволно јасни изјави за НОВА, Сашо Стојчев директор на Градската општа болница „8 Септември“.
На Хирушките клиники велат дека опремата која што беше набавена со големиот тендер во здравството нема ХД резолуција, ниеден апарат нема видео запис, така што она што надлежните сугерираат да се набави нема да овозможи квалитетна снимка.
– Вака нема да можеме да оперираме, многу погрешни проценки и нејасни податоци се наведени во писмото од Министерството кои доведуваат до конфузија изјави за НОВА Милчо Пановски абдоменален хирург.
Инаку, снимањето кое треба да биде задолжително за време на операциите беше различно протолкувано кај лекарите. Додека едни сметаат дека е добро да се има архива во случај да затреба во некој судски процес, други сметаат дека снимката не е никаква гаранција бидејќи лесно може да се скрати дел од снимениот материјал, со што ќе се уништи доказот доколку дојде до лекарска грешка.
Многумина од лекарите кои сакаа да останат анонимни, сметаат дека во вакви лоши услови кога болниците кубурат со финасиски средства и тонат во долгови, смешно е да се набавуваат камери од кои една чини од 10 до 20 000 евра. Дотрајаните апарати за дијализа, набавка на поефтини и несоодветни лекови за болните од леукемија, немање на лекови за децата со ретки болести, лошата хигиена во болниците, лебарките во болничките соби, ова се и понатаму суштински работи кои ги засегаат и лекарите и пациентите за кои тие сметаат дека имаат поголем проритет од набавката на видео камери.