Општина Арачиново ќе добие еден милион евра од Буџетот за санирање на канал за отпадни води. Одлуката е донесена на денешната 72-ра седница на владата и на социјалните мрежи ја сподели првиот вицепремиер, Артан Груби.
„Конечно ќе се санира каналот за отпадни води во Општина Арачиново. На денешната седница на владата ја донесовме одлуката за спроведување на постапка за јавна набавка за регулирање на обиколниот канал во оваа општина. Исклучително важна инвестиција вредна околу 66 милиони денари која ќе овозможи подобар живот на Арачиновци“, напиша Груби на неговиот официјален Фејсбук профил.
Проектот за санирање на каналот за отпадни води во Општина Арачиново до влдата го достави мнистерот за животна средина и просторно планирање , Насер Нуредини со уште два други проекта – за изградба на фекална канализација во село Страчинци во Општина Гази Баба и реконструкција на системот за водоснабдување во Богданци.
Овие проекти се дел од инвестициската програма на Министерството за животна средина и просторно планирање (МЖСПП), во делот за финансирање проекти за водоснабдување и изградба на примарна и секундарна канализација и се во согласност со стратешките приоритети на МЖСПП за развивање современа и функционална водоводна инфраструктура, заштита на животната средина и подигање на степенот на социјален развој и квалитет на живот во сите општини во нашата држава.
Според МЖСПП, по спроведување на сите претходни подготвителни постапки, во најскоро време ќе следи тендерска постапка за избор на изведувач и започнување на изведбените работи за реализација на гореспоменатите проекти.