Советот на општина Центар ја прифати иницијативата на граѓанското здружение “Плоштад Слобода” за измена и дополнување на урбанистичките планови со цел враќање на зелените површини во центарот на градот со 12 гласа “за” и 11 “воздржан”, како што гласаше советничката група на ВМРО ДПМНЕ.
Расправата на оваа последна и најжешка точка на дневниот ред на Советот помина во тензична атмосфера со многу надвикувања и препукувања помеѓу двете советнички групи.
Главниот аргумент на ВМРО ДПМНЕ за отфрлање на иницијативата беше дека нема потреба од нејзино разгледување бидејќи и онака според програмата на општината било предвидено да се разгледува деталниот урбанистички план. Беше повикан и раководителот на секторот за урбанизам за да потврди дали постои програма според која се разгледува ДУП-от.
Раководителот потврди дека според програмата е предвидено разгледување на ДУП-от, но претседателот на Советот побара од него да дообјасни дека тоа разгледување е само техничко поради новите усогласувања со ГУП-от кои ги прават сите општини во Скопје и дека воопшто не се однесува на истата работа.
“Плоштад Слобода” бараат градежните парцели во центарот на градот кај Бристол и АутоМакедонија да се пренаменат во зелени површини, односно да им се врати првобитната намена.
Градоначалникот Андреј Жерновски поради, како што велат од таму неодложни обврски не присуствуваше на разгледувањето на оваа точка на што ВМРО ДПМНЕ остро реагираше и го обвини дека бега од нивните прашања.