Општина Карпош на својата официјална интернет страна, објави информација за можниот загадувач во саботата, кога нивото на ПМ10 честичките беше 1.218. Информацијата е насловена „Облак од смог долж Качанички пат?!“, на крајот со извичкик и прашалник. Општината се повикува на дојави на повеќемина граѓани, кои испратиле фотографии и снимки, на кои „од повисоките места во Карпош (кај манастирот Св. Пантелејмон) бил забележан облак кој се движи долж течението на реката Лепенец кон Карпош“.
„Поточно, според нивните кажувања, најверојатно станува збор за ПМ честички кои се нуспроизвод од изработка на градежни материјали, а токму во тој дел кај Качанички пат се наоѓа најголемата цементарница на соседно Косово, но и други помали индустриски капацитети за произвидство на гипс и други градежни материјали“, соопштија од општина Карпош.
Оттаму велат дека очекуваат од надлежните државни инспекциски служби задолжени за заштита на човековата околина да го лоцираат најголемиот потенцијален загадувач и соодветно да реагираат, со цел да се спречат вакви испади.