Евроамбасадорот Аиво Орав, во интервју за МТВ рече дека најкритични прашања од политичкиот договор се именувањата на специјалниот јавен обвинител и првиот човек на МВР.
Тој воедно ги повика уредниците и новинарите во МТВ, да се ослободат од автоцензурата и да известуваат независно, забележувајќи претходно дека медиумите добиле многу критики во извештајот на ЕК, но повеќето медиуми за тоа не сакале да известуваат.
– Медиумите и судството добија доста критички забелешки во минатогодишниот Извештај за напредокот. Но, интересно е тоа што повеќето медиуми во земјава не сакаа да известат за тие критики во Извештајот за напредокот. Во земјава, правилата се добри, законите се совршени, прашањето е спроведувањето. Во случајов, Владата може да покаже дека се грижи за вредностите на ЕУ. Дадовме листа препораки и тие треба да се спроведат. Но слободата на медиумите почнува од новинарите, од уредниците. Ако постои самоцензура, како може да има професионално новинарство? МРТ е клучното прашање, бидејќи сте финансирани од плаќачите на данок, а тие очекуваат од вас независно и професионално известување, рече Орав во интервјуто за МТВ.
Околу преговорите за политичката криза тој оцени дека се изгуби значајно време за земјава, но дека се надева дека со договорот земјата ќе се врати на својот евроатлантски пат.
Според Орав има многу критични прашања во договорот што партиите може да ги протолкуваат на различни начини, при што едно од нив е специјалниот обвинител.
– Специјалниот обвинител со целосна автономија треба да биде назначен до 15.септември. Се надевам дека партиите ќе најдат решение самите, но ако има потреба, можеме да помогнеме повторно. Второ критично прашање е датумот 20.октомври, кога треба да бидат назначени двајца нови министри и петмина заменици-министри. Најкритично е изгледа Министерството за внатрешни работи, рече европскиот амбасадор.
Тој смета дека сега е можност Владата заедно со опозицијата и со граѓанското општество да ги спроведе реформите.
– Прво, договорот треба да биде спроведен 100 отсто, второ, треба да бидат спроведени сите реформи, рече меѓу другото Орав.
На прашањето дали конечно Македонија може да се надева на датум за преговори, Орав одговори дека рокот за подготовка на извештајот за прогресот на Македонија е 1.септември, но дека, за жал, годинава нема многу позитивно во оваа фаза.
– По многу години гледаме дека четворицата лидери дојдоа и седнаа на иста маса, но тоа беше со помош на ЕУ и на САД во оваа фаза. Има само месец и неколку дена да се подготват и спроведат реформите. Доставивме листа препораки и се надевам дека август ќе биде искористен ефикасно“, порача евроамбасадорот Аиво Орав.