Амбасадорот на ЕУ во Македонија, Аиво Орав, вели Македонија има сериозни проблеми во поглед на вредностите за демократија, слобода и правда кои ги промовира Европската унија.
Како што рече Орав на дебатата насловена „Европската унија треба да се прошири и да ги вклучи земјите од Западен Балкан“, единствените позитивни моменти од изминатава година за Македонија се мирните антивладини протести и тоа што политичките лидери покажале подготвеност да разговараат за надминување на кризата во земјава.
– Денес има сериозни проблеми во вашата земја, сакавме да го свртиме вниманието во октомврискиот извештај кога се обидовме да ги нагласиме проблемите во судството, правдата, корупцијата и слободата на говор. Оваа земја е кандидат и сакаме да биде подготвена за членство, рече Орав.
Изминативе месеци известувачите за земјава се обидувале да најдат позитивни факти за Македонија кои би ги вклопиле во извештајот за напредок на земјата кој треба треба да биде готов до 31.август, а Орав рече дека изминатава недела се случиле неколку позитивни работи.
Меѓу нив биле формриањето на Советот за безбедност кој го свикал претседателот Ѓорѓе Иванов, потоа антивладините протести, за кои рече, беа мирни и граѓански, потоа лидерските средби, и состанокот во Стразбур меѓу Заев и Груевски.