Клучните забелешки изостанаа од новиот нацрт закон за медиуми, се жалат повеќето од македонските медиумските организации. Освен интервенции во членот 4, законот останува во рамките на идејата да ги регулира сите медиуми – весници, телевизии, радија и интернет.
Нема промени ниту по главните препораки на ОБСЕ и Советот на Европа во однос на составот и ингеренциите на регулаторот, односно Агенцијата за медиуми, препораки чија имплементација треба да ја гарантира политичката независност на органот. Еве кои беа клучните препораки на Советот на Европа и на ОБСЕ.
•Зголемената опасноста од контрола на власта во Агенцијата за радиофизија е главната забелешка во анализата на Советот на Европа. Се предлага членовите во советот да се бираат со двотретинско мнозинство во парламентот, да се намали бројот на членови кои ги предлага Собранието, а да се зголеми бројот на членови кои ги предлага невладиниот сектор.
•Советот на Европа препорачува да се изземат печатените медиуми и интернетот од регулацијата, а уште посилни се забелешките тоа да се прави во еден закон
•Дефинирањето на новинарот е рестриктивно и неприфатливо во формата во која е дадено во законот, а и дефиницијата на медиумски издавач ја сметаат за контрадикторна
Ниту една од овие препораки во моментов не е во новата верзија на нацрт законот. Министерството единствено постапило по препораката да се намали мандатот на членовите на Советот во Агенцијата од 9 на 7 години, но според македонските организации тоа воопшто не е суштински проблем.
Од МИМ и ЗНМ велат дека се уште не стигнале да направат темелна анализа на новото решение бидејќи било објавено доцна во текот на ноќва, но од она што можело да се прочита, законот не се бави со суштинските проблеми кои во него ги детектираа и домашните и странските организации.
-Забелешката околу номинирањето на членови во Советот како концепт останува во новиот закон и мислам дека тоа треба се уште да го разговараме затоа што препораката тоа да се промени стои и во анализата на Советот на Европа и во онаа на ОБСЕ, вели Билјана Петковска од МИМ.
Незадоволство доаѓа и од редовите на ЗНМ.
– Оваа нова верзија е само фризирање на претходната. Ниту една клучна забелешка на ЗНМ не е прифатена , концептот е ист – да се опфатат сите медиуми. Или накусо, кога бевме во основно училиште, нашите учители на задаваа една трик задача, не прашуваа колку се пет баби и пет жаби. Нормално, неа беа десет, туку бабите си беа баби, жабите жаби. Е, сега министерството во овој закон сака да не убеди дека пет баби и пет жаби се десет, вели Ердем Ахмет од управниот одбор на ЗНМ.
На денешната трибина на Македонскиот институт за медиуми гостуваше и авторот на експертската анализа на Советот на Европа Бернхард Мовс кој уште еднаш ги повтори главните забелешки на новиот закон за медиуми и опасностите од силни политички влијанија кои доаѓаат со одредени решенија во законот.