Од „Орка Холдинг“ ги демантираат денешните информации за полициска акција во фирмата „Монт“ што се поврзува со Орце Камчев, кој планирано е утре да сведочи во случајот „Рекет“. Преку соопштение од компанијата велат дека не станува збор за полициска акција, туку за контрола од страна на двајца инспектори од МВР, на кои им се доставени потребните документи. Тие, како што велат, потврдиле дека нема ништо спорно во работењето на компанијата.
Извори од истрагата, претходно информираа дека под контрола се три фирми – „Монт“ и „Полиестердеј“ и една шпанска фирма, а во врска со долг од околу 400.000 евра за финансирањето на политичката кампања на ВМРО-ДПМНЕ за претседателските избори од април и мај годинава. Според официјалните податоци од Државниот завод за ревизија, ВМРО-ДПМНЕ во септември ја затвора сметката со неплатени 442 илјади евра, иако имала долг кон фирми кои печател маици за кампањата на претседателскиот кандидат на опозицијата, професорката Гордана Силјановска – Давкова.
Од „Орха Холдинг“ демантираат дека биле вклучени во претседателската кампања и дека имаат било каква поврзаност со компанијата „Полиестердеј“.
„Ние ја поздравуваме инспекцијата затоа што тоа е во насока конечно да се расчисти политичката и медиумска хајка што се води против приватните компании во Македонија. Ваквата непрофесионалност и едностраност е против интересите на коректно и правилно информирање на јавноста, а извршува директна штета врз угледот на приватните компании. Сакаме уште еднаш да демантираме дека ниту компанијата „Монт“, ниту „Орка Холдинг“ на било каков начин имаат учествувано во предизборната кампања на г-ѓа Силјановска на претходните претседателски избори. Маиците од компанијата „Монт“ која работи во областа на текстилната индустрија беа нарачани и набавени единствено на страната на „Полиестердеј“, компанија со која ние имаме долгогодишна соработка, а која во случајот е наш должник и станува збор за долг за кој веќе имаме испратено опомена пред тужба до должникот. Со понатамошните активности на „Полиестердеј“, по набавката на маиците не сме никако поврзани ниту навлегуваме во истото. Изнесувањето на информациите во јавноста на овој начин е пример за класична инсинуација, нешто со кое се прават обиди во јавноста да се наруши угледот и името на нашите брендови“, се вели во демантот.
Со став излегоа и од политичката партијата ВМРО-ДПМНЕ. Пратеникот од ВМРО-ДПМНЕ, Антонио Милошоски, вели дека има нервоза кај власта поради случајот „Рекет“ и се обидуваат да спинуваат.
„Владата е нервозна во врска со случајот „Рекет“ и нашите сознанија говорат дека навистина има и зошто да биде нервозна. Владата ќе има реакции за да спинува или за да влијае на кои било потенцијални сведоци кои би можеле да разоткријат нешто дополнително во аферата“, рече Милошоски одговарајќи на новинарско прашање.
Од владејачката партија СДСМ, пак, повикувајќи се на ревизорските извештаи, велат дека се работи за долг на опозицијата за кампањата на нивната кандидатка Гордана Силјановска-Давкова, на сметка која е затворена, што е спротивно на законот.
„Согласно Изборниот законик (член 71) сите трошоци за кампањата исклучиво треба се покријат од средствата на таа сметка. Долгот на ВМРО-ДПМНЕ од 400.000 евра останал, а сметката за оваа кампања е веќе затворена. Значи веќе нема законска основа за покривање наовој огромен долг. Очигледно, ВМРО-ДПМНЕ и потписникот на сметката за овие избори, генералниот секретар Игор Јанушев, не го почитувале Изборниот законик“, изјави портпаролот на СДСМ, Костадин Костадинов.