Фирмата „Монт“, поврзана со сведокот во случајот „Рекет“, Орце Камчев, од утрово е мета на истражните органи. Ден пред најавеното утрешно негово сведочење во постапката против Бојан Јовановски и Катица Јанева, полициски инспектори „чешлаат“ документација и во уште две фирми за долг од 400.000 евра на ВМРО-ДПМНЕ за финансирање на кампањата за последните претседателски избори.
Според сознанија на Нова ТВ, фирмите биле ангажирани за печатење на пропаганден политички материјал. Извори од истрагата ни потврдија дека акцијата е во тек и дека МВР и ОЈО се во постојана координација.
Инаку, на средината на септември, портпаролот на владеачката СДСМ, Костадин Костадинов, на прес-конференција, јавно побара одговор од лидерот на ВМРО-ДПМНЕ, Христијан Мицкоски на неколку прашања меѓу кои и „дали Орце Камчев е финансиер на изборна кампања на најголемата опозициска партија“.
„Што е тоа што Мицкоски не сака да се дознае во јавноста за случајот „Рекет“? – Наместо да шири лажни вести, тој е должен да излезе пред јавноста и да одговори: Дали Орце Камчев, тајкун излезен од режимот на ВМРО-ДПМНЕ и обвинет во предмети на СЈО, е финансиер на изборна кампања на ВМРО-ДПМНЕ? – Дали станува збор за изборната кампања за последните претседателски избори? – Дали знае да одговори Мицкоски колку тоа го чинело Камчев односно неговите фирми финансирањето на изборната кампањата? Одговор може да даде и генералниот секретар на ВМРО-ДПМНЕ, Игор Јанушев како потписник на сметката на партијата“, изјави во таа прилика Костадинов.
Според податоци од Државниот завод за ревизија, најголемата опозициска партија во септември ја затворила сметката со неплатени 442.000 евра.