Граѓани, фирми, здруженија и државни институции наплатија над 4 милијарди денари (66,2 милиона евра) од осигурителните компании за настаните штети покриени со неживотно осигурување во 2021 година.
Вкупниот износ на исплатени штети (бруто исплатени штети БИШ) минатата година е повисок за 14 отсто во споредба со 2020 година. Лани се исплатени речиси 80.000 пријавени штети, покажуваат официјалните податоци на Агенцијата за супервизија на осигурување.
За пријавени штети врз осигуран имот осигуреници лани наплатиле 13 отсто повеќе од 2020 година. Сите 11 осигурителни компании за неживотно осигурување за штети врз осигуран имот лани исплатиле 710 милиони денари (11,5 милиони евра). Друштвата за осигурување лани исплатиле речиси 9.000 оштетни побарувања на своите осигуреници. За осигуран имот на физички лица се исплатени вкупно 316 милиони денари (над пет милиони евра), а на правни лица 394 милиони денари (6,4 милиони евра).
Кај најбрзорастечката класа – приватно здравствено осигурување, исплатата на штети го следи растот на продажба на осигурителни полиси. За минатата година девет осигурителни компании исплатиле 211 милиони денари. Тоа е двојно повеќе од износот на штети што го исплатиле во претходната 2020 година во која поради здравствената пандемија и почна да расте популарноста на оваа доброволна осигурителна класа.
Кај осигурувањето од незгода ( најмасовна класа на доброволно осигурување кое покрива речиси 700.000 осигуреници) лани се исплатени штети во вкупна вредност од 434 милиони денари, а тоа е за осум отсто повеќе од претходната година.
За штети врз каско осигурани возила осигуреници наплатиле 507 милиони денари или четири отсто повеќе од 2020 година.
Од помалку застапените класи на доброволно неживотно осигурување импозантни растови на исплатени штети бележат три осигурителни класи. Исплатените штети за карго осигурување се зголемени за 7 пати во однос на 2020 година), а речиси е удвоен износот на исплати за осигурани штети од финансиски загуби. Кај осигурувањето кредити се исплатени 3,75 милиони денари (61.000 евра) додека во 2020 година немало исплати.
Патничкото осигурување е единствената класа во која лани износот на вкупно исплатени штети е понизок во однос на 2020 година. Сите 11 осигурителни друштва исплатиле 40 милиони денари што е за 15 отсто помалку од 2020 година.
Во најголемата класа – осигурување од автомобилска одговорност 11 компании лани исплатиле 2,1 милијарди денари за речиси 30.000 пријавени штети. Износот на исплатени штети лани е за 12 отсто повисок од претходната година.
Во вкупниот износ на исплатени штети лани АДОР „Македонија“и „Еуролинк“ учествуваат со по 362 милиони денари, „Триглав“ со 570 милиони денари, „Сава“ со 463 милиони денари, „Евроинс“ со 396 милиони денари , а „Винер“ со 341 милиони денари. „Граве Неживот“ лани исплатила 142 милиони денари, „Уника“ 408 милиони денари, „Осигурителна полиса“ 261 милиони денари, „Халк Осигурување“ 512 милиони денари, а „Кроација Осигурување – неживот“ 250 милиони денари.