Вицепремиерот задолжен за европски прашања Бујар Османи денеска ќе престојува во посета на Атина, каде што ќе се сретне со шефот на грчката дипломатија Никос Коѕијас и со заменик министерот за надворешни работи Јоргос Катругалос.
На средбите ќе бидат отворени прашањата поврзани со европските интеграции на Република Македонија и теми од заеднички интерес, соопштија Секретаријатот за европски прашања при македонската Влада и грчкото МНР.
Османи вели дека Скопје и Атина работат на градење на довербата и оти само во таква атмосфера е можно да се направи обид за изнаоѓање заедничко прифатливо решение околу разликите за името.
Османи, во интервју за Независната балканска новинска агенција -ИБНА во пресрет на денешната посета на Грција, повторува дека наредните шест месеци претставуваат историска шанса за Република Македонија да направи сериозен исчекор за затворање на прашањето за членство во НАТО и за отворање на перспективата за пристапни преговори за членство во ЕУ. На домашен план фокусот е на реформите во приоритетните области.
– Паралелно ќе работиме и на градењето доверба со Атина, како единствена можност за да постигнеме атмосфера во која ќе може да го затвориме и прашањето за името. Тоа е усогласена владина политика, па во тој контекст ќе биде и мојата посета на Атина, вели Османи.
Во овој момент, како што посочи, примарна цел на Владата е да ја интензивира комуникацијата меѓу Скопје и Атина, притоа искрено посветувајќи им се на мерките за градење доверба меѓу двете општества.
Вицепремиерот истакнува дека само во таква атмосфера на доверба е можно да се направи обид за изнаоѓање заедничко прифатливо решение околу разликите за името, за што верува дека во наредниот период ќе имаме резултат.
Министерот за надворешни работи на Грција, според грчките медиуми, за време на седницата на Владата, ги известил министрите за грчките позиции во преговорите за името.
Повикувајќи се на свои информации, медиумите во Грција, меѓу кои и државната агенција, како што јавува дописникот на МИА од Атина, објавија дека сложено име со географска одредница за севкупна употреба е позицијата што ја претставил Никос Коѕијас.