Во последно време од страна на некои аналитичари и публицисти како и претседателски кандидати има тенденција за замаглување на благородната идеја на ДУИ за консензуален кандидат за претседател, рече портпаролот на ДУИ, Бујар Османи.
Според него некои го прават тоа бидејќи не ја разбираат доволно оваа идеја но, за жал, има и такви кои оваа идеја на Демократската унија за интеграција сакаат да ја омаловажуваат или во крајна линија да ја приспособуваат во форма која им одговара на нив.
„Сакаме да укажеме пред јавноста дека идејата за консензуален претседател не е етноцентричната идеја на Ѓорѓе Иванов, без разлика што тој повремено тврди дека ќе биде претседател на сите граѓани на земјата, а ниту идејата за граѓанска држава која ја промовира Стево Пендаровски, барајќи глас подеднакво од страна на сите граѓани без оглед на нивната етничка и религиозна припадност“, рече Османи.
– Исто така, сакаме да ја информираме јавноста дека појавувањето на некој граѓанин Албанец кој се обраќа на албански по собири на некоја политичка партија не е концепт на консензуален претседател (кандидатот на либералите) или дури и некој кандидат Албанец за претседател на државата (Илјаз Халими) кој изјавува дека ќе ги штити интересите на сите граѓани во Македонија. Напротив, таквите појави имаат за цел искривување или злоупотреба на оваа идеја.
– Сакаме да ја потсетиме јавноста дека идејата на ДУИ за консензуален претседател има длабоки корени во Охридскиот рамковен договор, каде Албанците се државотворен народ, потсети Османи.
ДУИ бара идниот претседател да биде избран со договор постигнат помеѓу двете поголеми заедници, Македонската и Албанската пред се.
Како што е дефинирано во предизборната програма на ДУИ:
„Ставот на ДУИ е дека поединецот е слободен во неговото определување за демократските вредности за што се залага, но, во една мултиетничка држава, луѓетото не можат да се договарат надвор од заедницата, бидејќи се оформени од социјалниот и културен контекст на етничката заедница на која припаѓаат… Оттаму, основа за владеење на институциите е легитимитетот кој треба да го добијат од заедницата. ”
ДУИ го осудува секој обид за искривување и злоупотреба на оваа идеја, без оглед од која партија или политичка страна доаѓа.