Во време кога се строго забранети посети во болниците заради пандемијата со Ковид, на социјалните мрежи осамна фотографија на вицепремиерот за европски прашања Бујар Османи со претседателот на Собранието Талат Џафери кој е хоспитализиран на Инфективната клиника.
На фотографијата во болничката соба е и Неџати Јакупи, директор на Клиниката за торакална хирургија, кој претходно беше министер за животна средина.
Османи, кој беше и министер за здравство, на фотографијата која ја сподели на Фејсбук напиша „Еднаш воин, секогаш воин!“.
Со одлука на Министерството за здравство, на Клиниката за инфективни болести каде што се лекуваат пациенти со Ковид строго се забранети посети, а посети се забранети и во другите болници.
Директорката на Инфективна клиника, д-р. Милена Стевановиќ посетата на двајцата функционери кај Талат Џафери, ја правда со тоа што Бујар Османи бил повикан како абдоменален хирург за конзилијарно мислење за друг пациент.
„Тој беше дојден за конзилијарен преглед кај друг пациент, па го искористил моментот да го види пациентот“, изјави за НОВА, Стевановиќ.
Талат Џафери од петокот е хоспитализиран на Инфективаата клиника со пневмонија, како што беше официјално објавено во јавноста.
Но, Џафери ги има сите симптоми и класична клиничка слика на Ковид, потврди д-р. Стевановиќ за НОВА. Таа вели дека тестот што го направил во некоја лабораторија е негативен, но тоа не значи дека нема Ковид.
„Беше примен со температура, која сега веќе ја нема и со пневмонија. Тој има класична клиничка слика на Ковид, но тестот му е негативен. Ние го лекуваме, односно му даваме терапија за Ковид. Има специфична ренген снимка и други анализи кои укажуваат на Ковид и тоа не смее да се остави така, мора да се лекува“, изјави за НОВА, д-р Милена Стевановиќ, директорка на Клиниката за инфективни болести.
Таа рече дека не знае, не се сеќава каде му е направен тестот кој се покажал негативен, но потврди дека денеска му е земен нов тест.
„Денес му е земен нов тест и нема ништо чудно што првиот излегол негативен. Ние имаме пациенти со по 3-4 негативни тестови со симптоми на Ковид кои ги лекуваме, а дури последниот тест покажал дека е позитивен. Ќе ја следиме ситуација и здравствената состојба на пациентот“, објаснува Стевановиќ.
д-р.Милена Стевановиќ, директорка на Клиниката за инфективни болести
Стевановиќ вели дека Џафери е многу дисциплиниран како пациент, дека нема никакви посебни барања и дека остава лекарите да си ја вршат својата работа.
НОВА се обрати и во Центарот за јавно здравје-Скопје со прашање дали се пријавени и пронајдени контактите кои ги имал Џафери за да им се издадат решенија за самоизолација.
Од таму одговорија дека немаат добиено позитивен резултат од тест од било која лабораторија за Џафери и со оглед на тоа немаат обврска да ги бараат контактите.
