ДУИ смета дека предизборната кампања генерално беше фер и во демократски дух со некои исклучоци. Граѓаните на Македонија имаа можност да ги слушаат понудите на политичките партии и предложените кандидати за пратеници.
– За жал, за разлика од македонскиот политички блок, во албанскиот политички блок, ДУИ немаше достоен конкурент кој ќе одговори на моментот и контекстот во кој се наоѓа државата, рече денеска пред новинарите Бујар Османи.
Според Османи, за разлика од неговата партија која понудила проекти, политичките противници на ДУИ не направиле ништо и продавале лажни илузии.
– Ние сметаме дека Албанците во почетокот на овој век, со два универзитета и други научни и образовни институции не го заслужуваат ова. Но, ние од ДУИ знаеме зошто на нашите политички противници им недостасува ваквата храброст, бидејќи писмениот договор со народот пред се е одговорност, а тие немаат храброст за одговорност, рече Османи.
– И додека ние со писмо потпишано лично од нашиот лидер им честитаме на гласачите кои за прв пат добиваат можност за гласање, другите го злоупотребуваат тоа нудејќи уцени, закани и тајни договори, дополни тој.
За ДУИ комуникацијата преку писмо испратено до граѓаните е почит и благодарност за нивната волја, додека другите немајќи храброст да склучат договор со нив прават напори да склучат договор со македонските лидери, кои, според нив, тие треба да ја одредат судбината.
ДУИ е длабоко убедена дека гласачите ќе знаат да направат разлика помеѓу одговорноста и неодговорност, ќе знаат да прават разлика што е понуда а што е уцена и дефинитивно ќе можат да разликуваат кој прави договор во име на народот и кој во свое име.
Османи, во име на партијата изрази благодарност до сите, особено на над 150.000 граѓани, кои биле со нив на собирите овие денови.