Основачот на Викиликс Џулијан Асанж изјави денеска дека наскоро ќе ја напушти амбасадата на Еквадор во Лондон каде што престојува над две години.
Асанж во амбасадата се засолни за да ја избегне екстрадицијата во Шведска под сомневање за сексуално насилство.
Според него, тоа било само изговор на властите во Стокхолм да можат да им го предадат на САД каде го бараат за објавување тајни американски преписки.
Асанж денеска соопшти дека не ја напушта амбасадата поради здравствени причини, за кои пишуваа некои медиуми. Телевизија Скај њуз и други медиуми објавија дека 43-годишниот Асанж има бројни здравствени проблеми, бидејќи две години не излегол на сонце.
43 -годишниот Асанж има недостигот на витамин Д, се жалел на болки во градите, како и на срцева аритмија и висок крвен притисок. Претходно, во затворот Вандсворд, Асанж секој ден имал еден час шетање на свеж воздух, а сега е затворен во четири ѕида, јавуваат медиумите.
„Неговата светла кожа стана провидна, а поради сувиот воздух страда од хронична кашлица. Темните кругови под очите покажуваат дека не спие добро“, изјави новинарката Сара Оливер, која го посети Асанж.
Џулијан Асанж во 2012 година се засолни во зградата на еквадорската амбасада во Лондон, откако ги исцрпе сите правни средства против испорачување во Шведска.
Основачот на Викиликс е соочен со апсење по обвиненија за силувања и сексуално вознемирување во Шведска, каде властите во јули потврдија дека останува во сила налогот за негово апсење.
Асанж тврди дека обвиненијата против него се политички мотивирани и стравува од испорака во САД, каде што е обвинет за објавување доверливи документи на американската политика и дипломатија, како и за документи за војната во Ирак и Авганистан.