ВМРО-ДПМНЕ не отстапува од намерата ако премиерот Зоран Заев до 14.30 не ја депонира својата оставка во писмена форма, тие во Собрание да достават иницијатива за гласање недоверба на Владата. Часовникот отчукува а со оглед на, засега непроменетата состојба на политичката сцена, и натаму е неизвесно што ќе „отчука“ во 14.30.
Претседателот на ВМРО-ДПМНЕ, Христијан Мицкоски во вчерашниот настап на ТВ Сител, повтори дека е обезбедено мнозинство кое ќе изгласа недоверба на Владата и повика други пратеници, настрана од 61 за кој вели дека биле обезбедени, да и се приклучат на иницијативата.
-Отворена е вратата за секој што мисли дека оваа Влада на Заев не е добра, изјави Мицкоски.
Што се однесува до ДУИ, партијата вчера одржа Централен одбор кој резултира со одлука на лидерот Ахмети да му се дадат неприкосновени права сам да носи одлуки во врска со новонастанатата ситуација со оставката на коалициониот партнер Заев и дека со тие овластувања што ги има прво нешто што ќе прави е да разговара со претставници на другите партии со цел да се одржи политичката стабилност.
-Тие разговори се со цел да државата оди напред, на патот кон реформите се разбира во блиска консулатација со нашите стратешки партнери. Земјата е членка на НАТО и има одговорност за овој Сојуз и во тој дух во консултација со партнерите сакаме да им упатиме порака на граѓаните да бидат спокојни затоа што како што секогаш сме знаеле да го зачуваме овој курс на државата да бидеме заштитници на оваа држава, да бидеме сидрото на евроатланските вредности така ќе продолжиме и ќе обезбедиме сигурна иднина на граѓаните, рече Османи говорејќи од позицијата портпарол на ДУИ..
Според него, Ахмети ќе разговара со сите партии освен со деструктивните, дополнувајќи дека сите опции се на маса со сите конструктивни сили во државата.
Од СДСМ викендов , со јавноста општеа само преку соопштенија во кои главниот печат го имаше скептицизмот за можноста опозицијата да обезбеди ново парламентарно мнозинство.
-Деновиве ќе покажат дали ќе се избере нова анти-демократска, анти-Преспа, анти-НАТО и анти-ЕУ Влада, дали Мицкоски има капацитет и одговорност. Информациите кои вчера се појавија во јавноста, дека дел од пратениците кои се потпишале биле злоупотребени, кажува за какви „принципи” станува збор, наведоа Социјал демократите во вчерашното соопштение.
Ако денеска биде поднесена иницијативата, според процедурите, седница на Собранието би требало да се одржи во четврток, или три дена откако иницијативата е поднесена во Собрание.