По Даниела Рангелова која даде оставка од претседателската функција на Унијата на жени на ВМРО ДПМНЕ, од функцијата генерален секретар на Унијата се повлече пратеничката Лилјана Затуроска.
Таа на својот фејсбук профил ја објави оставката.
„Како генерален секретар поставен од претседателката Рангелова сакам да изразам голема благодарност за довербата која ми ја даде во два наврати и правев се од себе за да ја извршувам функцијата најдостоинствено што можеше. Рангелова и тимот ја поставија унијата на жени на високото скалило во партијата и така треба да продолжи. Функцијата генерален секретар на УЖ на најголемата и најмоќната партија беше задоволство и предизвик да се извршува.
Давам оставка од оваа функција со искрени желби за уште посилни успеси на идниот тим кој ке ја предводи унијата . Стојам на располагање на мојата партија почитувајки ги и извршувајки ги одлуките и активности кои ке ми бидат доверени во иднина, пишува Затуроска на својот фејсбук профил.
Претходно, Рангелова исто така преку фејсбук објави дека поднела неотповиклива оставка на функцијата претседателка на Унијата на жени на ВМРО ДПМНЕ, поради несогласување со политиката која ја води новото раководство. Таа обвини дека во партијата се води политика на неискреност, сплеткарење и внатрешни кавги по принципот раздели па владеј.
„Јас не можам да прифатам да бидал дел од расипани, токсични игри водени од амбицијата да се нахранат неколку суети. Да имаш амбиција е позитивно, но да бидеш спремен да газиш преку живи луѓе само за да си го задоволиш сопственото его и желбата за моќ, за мене е неприфатливо“ напиша Рангелова.
Вчера од функцијата кооринатор на пратеничката група на опозицската партија и коалицијата се повлече и Драган Данев.