Нема оставка и нема преодна влада, ова е заклучокот од 45 минутниот говор на претседателот на ВМРО ДПМНЕ и премиер Никола Груевски кој вечерва ги упати од митингот за поддршка на власта од бината пред Портата Македонија.
„Наши поддржувачи и соборци, кулминира нашата битка за идеалите во кои веруваме, девет години ја водиме оваа држава низ тешки предизвици. Македонија во овие три и пол месеци е во тежок напад во кој како ретко кога молчиме. Ние молчевме, но доста беше, Македонија време е да говори“, вака Груевски го започна својот долг говор со што ја навести острата и конронтирачка реторика со која ги упати пораките кон своите неистомисленици, вклучувајќи ги и граѓаните кои вчера протестираа пред владата и бараа негова оставка.
Тој се пожали дека ова било „диктатура на малцинството“ и најави дека „нема повлекување и нема предавање“. Груевски во центарот на Скопје рече дема нема да дозволи народот до таа мера да се закрви и меѓусебно да се пресметува и оти ќе ја добие оваа битка. Груевски повтори дека Зоран Заев, лидерот на опозицијата, со помош на странски партнери се обидувал да ја дестабилизира Македонија и дека тој тоа немало да го дозволи. Исто така, кажа дека милијардерот Сорос и Заев ги контролирале медиумите во Македонија.
„Цврсто веруваа дека ќе нè скршат, дека ќе нè прелажат со креирани, сечени и лепени снимки, со лажни воведи и наративи, дека ќе нè исплашат со терористички банди, дека ќе потклекнеме, дека ќе се предадеме, но вечерва го добиваат одговорот – Македонија не се предава, Македонија е силна. Им порачуваме нема повлекување, нема предавање“, рече Груевски.