Градот Скопје подготвува нов договор за јавно приватно партнерство за финансирање, дизајнирање, изградба, работа и одржување на Луна парк во Скопје, после пропаднатите неколку тендери. На следната закажана седница на Советот на Град Скопје, се очекува одговор и од советниците, јавува Фактор.
Инвестицијата за овој Луна парк е осум милиони евра.
-Со цел дополнително да се поттикне визијата на Град Скопје како развиен културно-историски и спортско-рекреативен туристички центар, една од долгорочните цели на Градот Скопје е реконструкција и изградба на нов и модерен забавен парк, кој ќе понуди нови објекти, повеќе реквизити за забава и возбуда, а во исто време и ќе пружи поголема безбедност за посетителите, во согласност со технолошкиот развој, европските модерни текови и вкупната економска политика, стои во образложението од Градот Скопје
-Имајќи предвид дека е потребна целосна реконструкција на веќе дотраените објекти и реквизити на постоечкиот Луна парк, овој модел нуди можност да се изгради нов современ забавен парк кој согласно стандардите на ЕУ нуди повеќе забава за посетителите, како домашни така и странски туристи и поголема безбедност за децата.
Договорот за воспоставување на јавно приватно партнерство, ќе се додели за период од 35 години при што рокот почнува да тече од денот на склучување на Договорот. По истекот на овој период, приватниот партнер е должен забавниот парк како и сите додатоци и подобрувања да ги пренесе во сопственост на Градот Скопје, се вели во образложението од Градот.