Ракометниот женски клуб „Вардар„ веќе трет ден е без тренер по отказот што раководстото на клубот ѝ го врачи на Индира Кастратовиќ. Процедурата за нејзин наследник е во тек, но ништо конкретно нема на повидок иако се ближи нова обврска во ракометната Лига на шампиони.
Под притисок на времето, а во неможност за навремено решавање на проблемот, во македонскиот женски ракометен првак посегнаа по привремено решение. Направен е „тренерски тим“ во кој влегува и спонзорот на екипата, Сергеј Самсоненко, потоа Едуард Кокшаров, спортски директор и Аце Станковски досегашен асистент на Кастратовиќ.
„Се надевавме дека ќе одиграме добро против Ференцварош, но не беше така. Индира ја сакаме. Со неа бевме четири години и се надевам дека ќе остане дел од Вардар. Интензивно бараме тренер меѓутоа не сакаме да избрзаме со одлуката. Затоа предложив да направиме тренерски тим за претстојниот меч во кој се Самсоненко, Кокшаров и Станковски“, рече спонзорот на ЖРК Вардар, Сергеј Самсоненко.
Поранешната голманка на Кометал Ѓ.П. и на репрезентацијата на Македонија, Гордана Нацева која е претседател на ЖРК Вардар, се надева дека Кастратовиќ, сепак, ќе ја прифати понудата да остане во клубот.
„Не бевме задоволни од стартот во Лигата на шампиони. Имавме неубедлив старт и неочекувано загубивме бод на домашен терен. Клубот процени дека е неопходен одреден потег што ќе придонесе за засилување на тимот и фокус на главната амбиција, а таа е финале во Лигата на шампиони“, го почна Нацева своето излагање за почетокот на сезоната на ЖРК Вардар во Лигата на шампиони.
За разделбата со досегашниот тренер Индира Кастратовиќ рече:
„Не беше лесно да се донесе таква одлука. Таа е во функција на високите амбиции на клубот и се надеваме на брза консолидација. Во однос на Индира имам и професионална и лична потреба да кажам дека таа е дел од овој проектот од самиот почеток, максимално се влложи во работата и остави белег и како тренер и како човек. Понудено е да остане во структурата на клубот и се надевам дека ќе одговори позитивно и ќе остане во семејството Вардар“.