Kнигата „Отворен круг” на театарската критичарка, новинарка и публицистка, Лилјана Мазова ќе биде презентирана на 25 септември во МКЦ, а воедно ќе биде дел од Програмата на 39. Млад отворен театар.
Мазова вели книгата претставува соочување со себе, со нив, со времето и со меморијата.
– Отсекогаш сум се чувствувала сигурна во тој наш театарски отворен круг. Никогаш како некој „од надвор“. Во театарот имам прекрасни пријатели со кои можам да бидам бескрајно долго. Дома и на разни патувања по светот. Млади или помалку млади соговорници за нивната и моја љубов – театарот, за нивната и моја работа – театарот. Во едно интервју ме прашаа дали сонувам театар? Одговорив дека е премногу од мене да се очекува и да сонувам театар. Знам дека тешко заспивам по лоша претстава, вели Лилјана Мазова.
– Поделеноста на четири дела: ПИСМА ДО (Мите Грозданов, Огнен Дранговски, Васил Зафирчев, Снежана Конеска – Руси, Дарја Ризова, Драган Спасов – Дац, Никола Ристановски), ТИЕ СЕ (Љубиша Георгиевски, Мушереф Прекиќ – Лозана, Љубица Остојиќ, Јоана Поповска, Емил Рубен, Слободан Унковски, Љупка Џундева), ЗА НИВ (Митко С. Апостоловски, Салаетин Билал, Ацо Јовановски, Младен Крстевски, Димче Мешковски, Петар Мирчевски, Благоја Спиркоски) и ОТПОСЛЕ (Бранко Ѓорчев (1962-2013), Мери Бошкова (1924-2014), Тодорка Кондова-Зафировска (1926-2001), Тодорче Николовски (1902-1999), Ненад Стојановски (1952-1998), Кирил Ристоски (1948-2011), Коле Чашуле (1921-2011)) или на 7 + 7 + 7 + 7 е мој авторски предизвик. Го сакам бројот 7. Носи среќа, искреност. За бројот 7 се врзани многу нешта во светот – од неговото постоење, потенцира таа.
Писателот Јордан Плевнеш анализирајќи ја книгата и творештвото на Мазова, професионалниот однос и љубовта кон театарот вели:
„Театарската, културната и читателската публика Лилјана Мазова ја знае со години/децении како новинарка, театарска критичарка, публицистка, колумнистка и авторка на книги за театарот во кои обработува различни теми/области од театарот. Приредила и изданија кои на културата, театарот и читателот му овозможуваат блискост со драмското писмо на автори од други простори (Словенија, Бугарија, Босна и Херцеговина…).
Како сведок на децениските настани во театарот во Македонија и во светот, во „Отворен круг“ сместува дел од својата меморија за создавачите на театарот, најмногу оние кои се најблиску до публиката – актерите. Со став за нив во форма на прозни записи.
Не ја крие приврзаноста и поврзаноста со нив. Ја отвора меморијата низ настани кои излегуваат од нејзиниот „момински ковчег“ во кој се само и само настани, ставови, случувања или уште којзнае што од она што неа ја изградило во автентичен сведок на големата македонска театарска меморија.
Навикнати да ѝ ги читаме рецензиите за претстави, драми, режисери, актери…, сега ни ја открива и поврзаноста со нив, она за што не пишувала. Отворена е кон творецот на кој му се обраќа за нам, на читателите, тие да ни станат уште поблиски. Оние коишто ги „премолчила“, ги сокрила во себе и еве ги сега низ „играта“ со бројот 7 (седум). Читаме „приказни“ кои се од нејзината театарска приказна на пишувач, неуморен театарски критичар и истражувач. Во нив ѝ се и верноста и љубовта кон театарот, со став до каде и како да ни го открие творецот и себеси во заедничката „љубовна приказна“ – Театар“, напиша Јордан Плевнеш за книгата и за личноста на Мазова.
Во презентација на книгата „Отворен круг“ ќе учествуваат Снежана Конеска – Руси, Никола Ристановски, Дарја Ризова, Емил Рубен, Драган Спасов – Дац и Васил Зафирчев.