Отворено писмо на лидерот на Достоинтсво Стојанче Ангелов до премиерот Никола Груевски.
Премиеру Никола.
Како прво, јас не сум “наречен Стојанче“ туку Стојанче е моето крстено име од раѓање до ден денес. Инаку, повеќето македонски граѓани ме знаат како “Генерал Стојанче Ангелов“ и ми се обраќаат со “Генерал“ или “Генерале“ па би било убаво кога во иднина, и Вие, би ми се обраќале со “Генерале“ или кога ќе зборувате за мене, да ме нарекувате “Генералот“ или “Генералот Стојанче“, кога веќе толку Ви е мерак заедно со вашиот д-р Латас, да ми се обраќате со моето родено име Стојанче, мислејки дека на тој начин ќе ме минимизирате, односно ќе ме направите помал. Изгледа моето име Ви остана единствениот аргумент кога сакате да го намалите мојот авторитет. Колку за илустрација, пред неколку дена, додека го фрлав ѓубрето, еден од неколкуте Роми кои се мотаа околу контејнерот, почна да вика по мене: Генерале, Генерале, каде да се потпишеме за референдумот? Но тоа се сепак само гладни и полуписмени Роми. Најверојатно не знаеја дека се викам Стојанче. Затоа и ми се обратија со “Генерале“. Вие сте друго. Вие сте Премиер. Вие знаете дека јас сум Стојанче. И уживате во тоа.
Премиеру Никола.
Во мојот живот сум работел многу дискретни работи кои останале тајна дури и за моите најблиски соработници. Посебно во периодот додека работев во специјалната полициска единица Тигар. Понекогаш, дури ниту ние, кои учествувавме во самите борбени акции, не знаевме каде се и што прават останатите наши тимови. Сме извршувале специјални полициски и воени операции во маскирни униформи на специјалната полиција, во плави униформи на регуларната полиција, сме работеле и во цивилна облека но сме работеле и во маскирни униформи на УЧК. Имам работено работи кои Вие и вашето опкружување можеби сте ги гледале, но само на филм.
По завршената работа молчевме. Молчевме и молчиме до денес. Ќе молчиме се додека сме живи со мала можност, некои од нас, а можеби и јас, на стари години, да напишеме некој мемоар. Се разбира доколку доживееме старост, нешто во што јас најискрено се сомневам.
Премиеру Никола.
Во мојот живот јас научив да чувам тајни. Без притоа тоа да ми смета или оптоварува. Ги чував тајните дури и кога можеби не требаше. Но кога денес го слушнав вашиот детски говор во Универзалната сала, детски говор во кој меѓу другото рековте дека на Бранко му помага “платеник за ситни пари наречен Стојанче“ едноставно не можев да оддолеам на желбата да споделам една партиска тајна на “Достоинство“ со македонската јавност. Бидејки вие сте тој кој прв го прекрши непишаниот договор за дискреција кој ние премолчано го постигнавме со вашиот човек. Партиска тајна за која веднаш го известивме раководството на нашите коалициони партнери. Партиска тајна поради која нашите коалициони партнери имаат неограничена доверба во нас.
Премиеру Никола.
Кажете и на македонската јавност колкава беше вашата последна понуда од пред неколку дена, понуда која ми ја дадовте на 28.02.2013 година, денот пред да ја одржите средбата со еврокомесарот Штефан Филе во Македонија, понуда која ми ја дадовте преку еден од вашите најблиски соработници, министер од претходните состави на вашата Влада, кој сепак потекнува од старото ВМРО-ДПМНЕ и кон кого сеуште имам доволно почит за да не го спомнам неговото име. Бидејки, тој и не е виновен. Тој само требаше да биде убедлив посредник, посредник кој повеќе од сигурно се јави по ваша наредба или барем со ваше знаење и дозвола. Кажете ја јавно вашата последна понуда до мене, бидејки во спротивно можеби јас ќе ја кажам. Во мојот мобилен телефон сеуште чувам неколку СМС пораки кои се повеќе од доволен доказ за да се види нечесниот, валкан и гнасен начин на кој вие и вашите најблиски луѓе работите.
Премиеру Никола.
Кажете и за вашата понуда од мај и јуни 2012 година. Кажете за да не кажам јас. Ве разбирам дека сте бесни и фрустрирани бидејки не сте навикнати некој да ве одбие. Но запомнете. Во Македонија има и чесни луѓе, чесни луѓе кои не можете да ги исплашите, чесни луѓе кои не можете да ги купите, чесни луѓе кои не се продаваат како стока, чесни луѓе кои имаат достоинство. За жал, вие не сте навикнати да соработувате со такви луѓе бидејки такви луѓе околу вас најверојатно има многу малку.
Лидер на македонските бранители
Претседател на “Достоинство“
Генерал СТОЈАНЧЕ Ангелов