Под мотото „Засади успех“ денеска се одржува 16-та по ред акција „Ден на дрвото“, во рамките на која ќе бидат засадени три милиона дрвца на 930 хектари земјиште низ цела Македонија.
Според граѓанското здружение „Ден на дрвото¬ засади ја својата иднина!“ денеска ќе бидат засадени и 7.000 леандри покрај автопатот Гевгелија¬Смоквица и 3.000 чемпреси покрај другите автопати низ државата, додека од Македонски шуми, за сите општини во Република Македонија ќе бидат доделени уште 67.000 дрвца.
Во досега одржаните 15 акции, засадени се околу 50 милиони дрвца, од кои според Македонски шуми, околу 60 проценти од нив се зафатени.
Минатата година, токму на Денот на дрвото, СДСМ , повикувајќи се на податоци од Државниот завод за статистика објави дека за четири години, откако почнала акцијата „Ден на дрвото“, шумскиот фонд наместо да се зголеми, се намалил за неверојатни 50 проценти. Односно дека од пошумени над 2.800 хектари во 2008 година, кога почнала акцијата – во 2012 година пошумената површина се намалила на нецели 1.400 хектари.
Од Министерството за земјоделство, шумарство и водостопанство тогаш одговорија дека „процентот на прифатеност во изминатите акции е 61%, а само ланската е скоро 90%, поради што граѓанската акцијата „ Ден на дрвото“ се одвива само во есенскиот период“ и дека „со секоја нова акција, не само што се пошумуваат нови површини, туку се пополнуваат и заменуваат неприфатените садници на постојните површини“.