Пациент нападнал докторка на скопските клиники. Како што дознава НОВА ноќеска насилен пациент ја нападнал дежурната лекарка на Клиниката за гастроентерохепатологија.
Станува збор за млад човек од населбата Ѓорче Петров, чиј идентитет е познат на полицијата. Тој на клиниката дошол заедно со неговата сестра, без упат со усна сугестија од Ургентниот центар да се јави на гастро бидејќи повраќал.
Лекарката го примила и го прашала дали ги поминал сите процедурални прегледи преходно, кај матичен лекар и во болницата „8 Септември“ бидејќи тегобите биле од пред 2-3 месеци.
Тогаш пациентот почнал да вика да и се внесува во лице, да ја навредува и турка, а во еден момент кога растревожена неможела да се извлече од ситуацијата и зазвонил телефонот по што таа го вклучила да се јави и побара помош, но пациентот силно ја удрил по раката.
Мобилниот телефон се распарчил на подот, а набргу на помош дошло обезбедувањето. Случајот веднаш е пријавен во полиција, а лекарката се наоѓа на боледување.
НОВА успеа да стапи во контакт со неа. Видно потресена од физичкиот и вербалниот напад лекарката која е позната по својата професионалност, стручност и љубезност кон пациентите речиси и неможеше да зборува. По препорака на психијатар таа ќе остане на боледување.
-Ниту сум насилна, ниту некогаш сум дозволила некој пациент да остане без медицинска помош. На клиниките има нередба од нашите директори доколку медицинскиот персонал е насилен пациентите да пријават. Каде сега јас да пријавам изјави за НОВА лекарката која беше и наградувана за својата работа.
Докторката рече дека случајот ќе го пријави и во Министерството за здравство иако не се надева дека ќе има некаков ефект.
Во последно време зачестија нападите кон медицинскиот персонал од страна на пациентите. Честопати вратите и стаклата на Ургентниот центар се искршени од насилни пациенти.
Неодамна беше нападната медицинската сестра на Клиниката за гинекологија, а минатата година на лекарката од психијатрија пациент и го скрши носот. Лекарите велат дека силно влијание на ваквата состојба има стратегијата во здравството со која пациентите се пренасочувуваат во секунадрно здравство наместо на клиниките поради што пациентите негодуваат, како и незадоволството кон матичните лекари кои се казнуваат доколку издаваат повеќе упати .
Најмногу од се според лекарите има влијание охрабрувањето на пациентите од страна на Министерството да ги пријавуваат лекарите доколку се незадоволни од нив, по што тие си земаат за право да бидат дрски и насилни кон медициснкиот персонал.