Статус-кво позицијата во поглед на името, и другите проблеми, не е застој туку назадување за земјата. Потребна е добра политичка волја од Македонија, од нејзините соседи и од ЕУ, да се најде излез од таа ситуација, бидејќи таквата состојба, долгорочно, не е од корист за никого, е описот кој словенечкиот претседател Борут Пахор го даде за моменталната состојба во државата во поглед на спорот за името и нејзиното евроинтегрирање.
Притоа тој ја повтори пораката која ја пренесе ден порано, дека Македонија треба да даде конкретно нова иницијатива за заживување на дијалогот меѓу Скопје и Атина, за да може Атина на тоа да даде некаков договор.
„Морам да кажам, тоа е реалната политика, дека колку и да се чуствува Македонија дека е во неправедна положба, пред се поради нејзините стратешки цели мора да се направи некаков гест кој ќе и понуди на меѓународната заедница чуство дека е конкретно и ќе ја присили да одговори на тоа, бидејќи ваквиот статус-кво не е добар“, изјави Пахор.
Според него, тој не треба да нуди решенија, но сепак посочи дека тој самиот како претседател на владата на Словенија го решавал проблемот со Хрватска.
Од друга страна македонскиот претседател, изрази надеж дека политичарите ќе почнат да го прават она што го прават спортистите, да ги обединуваат луѓето.
„Ако важеа спортските правила во Европската унија досега Македонија ќе беше членка на Унијата“, изјави претседателот на Македонија Ѓорге Иванов.
Пахор е втор ден во официјална посета на Македонија. Освен со претседателот Иванов, тој денеска се сретна и со собранискиот спикер Вељаноски и со премиерот Никола Груевски.