Бројот на жртвите од земјотресот во Пакистан се искачи на 238. Голем број луѓе и понатаму остануваат под урнатините, а спасувачките акции се во тек, јавува ББЦ.
Земјотресот од 7,7 степени го погоди јужно-западниот дел на Пакистан.
Пакистанските власти соопштија дека сите жртви се од градот Аваран, каде што беше и епицентарот на потресот, или од неговата околина, а материјалните штети се огромни- скоро сите куќи и објекти се уништени, а околу 30 проценти од зградите и куќите се урнати.
Земјотресот, кој бил почувствуван и во индискиот главен град Њу Делхи, бил на длабочина од десет километри под површината на земјата.
По земјотресот во крајбрежјето на Пакистан дојде до невообичаена појава, кога од водите на Арапското Море „изникна“ нов остров. Островот е висок меѓу шест и девет метри и се наоѓа на оддалеченост од околу 350 метри од брегот. Сеизмологот Захид Рафи оцени дека оваа појава и не е толку изненадувачка, имајќи ја предвид јачината на потресот.