Палењето на мазутот за загревање на болницата во Куманово е причината за екстремно високи нивоа на ПМ10 честички измерени во Куманово синоќа, соопшти општината.
„Мерната станица за мониторинг на амбиенталниот воздух последните десетина години е поставена во болничкиот круг на кумановската болница, непосредно до котелот за затоплување на истата. Анализата на информации добиени од мерната станица за каков тип на загадувач се работи од страна на надлежното министерство покажува дека најголемите пикови на загаденост е резултат од палење на фосилно гориво и истите се во период кога котелот за затоплување на болницата се пали, но по краток период се нормализира состојбата на штетните PM 2,5 и PM 10 честички“ пишува во соопштението од општината.
Општината бара од Министерството за здравство да одвои пари за да се гасифицира болницата.
Од општината додаваат дека синоќа почнале со аеросолизација, односно распрскување на вода во воздухот, за да се налами загадувањето.
Неколку вечери по ред во градот имаше енормно загадување на воздухот, кое изнесуваше и до 1.850 микрограми на метар кубен, што е 35 пати повеќе од дозволеното.