Претседателот на Кривичниот суд, Владимир Панчевски, денеска бил повикан во Јавното обвинителство за гонење на организиран криминал и корупција за да даде исказ за кривичната пријава која му ја поднесе негов колега, судијата Иван Џолев.

Судијата Џолев минатата недела му поднесе кривична пријава на Панчевски за „Примање награда за противзаконско влијание“. Но, сега Панчевски го возвраќа ударот и тој му поднел пријава на Џолев за лажно пријавување.

„По даденото произнесување во врска со наводите во кривичната пријава ја известувам јавноста дека од моја страна на записник пред надлежниот јавен обвинител откако ги слушнав наводите на пријавата и се произнесов по истите отфрлајќи ги како неосновани истовремено поднесов кривична пријава против судијата Иван Џолев за кривично дело „Лажно пријавување на кривично дело“ во смисла на чл.366 ст.1 од КЗ за тоа што лажно ме пријавил како сторител на кривично дело од чл.359 од КЗ за кое гонењето се презема по службена должност иако знаел дека не сум сторител на кривично дело“, пишува во соопштението од Кривичниот суд.

Како што веќе објавивме, судијата од Кривичниот суд Иван Џолев, на 2 ноември му поднесе пријава на неговиот шеф Панчевски за влијание врз судијско одлучување. Панчевски тврди дека тој не памети дека некогаш вршел притисоци врз судиите и дека секогаш работел професионално.