Владимир Панчевски, поранешен претседател на Кривичниот суд кој на почетокот на месецов замина на издржување на затворска казна, откако беше осуден за злоупотреба на службената положба и овластувања само што излезе од затворот во Шуто Оризари.
Претходно, за Нова ТВ Филип Андов, директорот на затворот потврди дека до пладне поранешниот судија ќе го напушти затворот затоа што Врховниот суд ја укина пресудата на апелациските судии кои сториле повреда на правото на одбрана на Панчевски и овој судски предмет сега треба да се врати на повторно одлучување пред Апелацискиот суд.
Панчевски беше осуден на затворска казна од 3, 5 години поради, како што пресуди велешкиот суд, злоупотреби со електронскиот систем (АКМИС) според кој се распоредуваат судските предмети кај судиите. Пресудата од трииполгодишната казна за Панчевски подоцна Апелација ја намали на две и пол години која тој почна да ја издржува, но во меѓувреме Врховниот суд донесе пресуда со која го уважи Барањето за вонредно преиспитување на правосилната пресуда со која беше осуден поранешниот претседател на скопскиот кривичен суд.
Со оваа пресуда на Врховниот суд се укинува пресудата на Апелациониот суд, а Панчевски треба да излезе на слобода. Во случајов е направена повреда на Европската конвенција за човекови права. Врховниот суд посочува дека согласно судската пракса на Европскиот суд за човекови права, принципот на правично судење подразбира на секоја од странките да и се даде разумна можност да го претстави својот случај под услови кои нема да ја стават во позиција на суштинска понеповолност vis-а-vis спротивната страна.
Во тој контекст, Врховниот суд насочува дека Апелацискиот суд треба да одржи седница на која уредно ќе бидат повикани и јавниот обвинител, така и обвинетиот Панчевски со одбраната за да можат да ги изнесат нивните ставови, но и да направат непосредна оценка на доказите, што не било случај при претходното одлучување на апелациските судии.
Обвинетиот Владимир Панчевски во својот исказ во завршниот збор на крајот од судскиот процес дека јавниот обвинител не бил запознат со целата материја со која го води предметот, бидејќи имало грешка на АКМИС, а јавниот обвинител не го видел тоа. Воедно тој во својот завршен збор истакна дека ова обвинение е политички опструирано и лицемерно, бидејќи се поведува една година по завршување на неговиот мандат во Основниот суд Скопје 1, односно тие го обвинувале дека само тој повредувал права, а не и судиите кои суделе.
Панчевски, според обвинението поднесено од ОЈО Скопје, се товараше дека во периодот од 23 јануари 2013 година до 14 септември 2016 година, со негов параф и усно давал наредби на службеници што имале пристап во АКМИС-от рачно да се распределуваат конкретни предмети меѓу судиите надвор од времето на приемот на предметот во судот и кажувал на кој судија да се распредели предметот, со што целосно се изигрувал системот кој требало автоматски да ги распределува предметите.