„Доаѓам од Струмица каде што имам пријатели Турци, Роми, Албанци, а играм и во екипа од многу националности и за мене нема разлика“, вели најдобриот голгетер на Македонската фудбалска репрезентација а воедно и еден од најголемите амбасадори на земјата, Горан Пандев во интервју за проект на USAID за меѓуетничките односи.
Уште во образованието треба да сфатиме дека сите сме исти, и во училиште се учи за меѓуетничка интеграција, а во Македонија тоа треба да се подобри, истакнува Пандев.
Без разлика на националноста, заедницата е таа што постигнува резултати, заклучува Пандев, рефлектирајќи се на своите сегашни моменти во мулти-националниот фудбалски клуб Наполи.
Зборувајќи за ситуацијата на терените кога настапува репрезентацијата на Македонија во која има играчи од албанска националност, за Горан сите сме Македонија, и непријатно е свиркањето на колегите.
„Треба сите заедно да се потрудиме и тоа да го промениме, не само во репрезентацијата, туку и во клубовите уште во младите категории, да им го покажеме заедно на децата вистинскиот пат“, е пораката на Пандев.
Со проекти кои уште од најраните години на децата ќе им укажат дека националноста не е важна, и сите сме исто, вели Пандев, меѓуетничките односи можат да се подобрат.